نئے چیف الیکشن کمشنر نے عہدہ سنبھا لیا 2 اراکین کے تقرر کانوٹیفکیشن بھی جاری کر دیا گیا

  جمعہ‬‮ 24 جنوری‬‮ 2020  |  16:25

اسلام آباد(این این آئی) وفاقی حکومت نے الیکشن کمیشن آف پاکستان کے سربراہ اور دیگر 2 اراکین کے تقرر کا نوٹیفیکیشن جاری کردیا جس کے مطابق سکندر سلطان راجا بطور چیف الیکشن کمشنر 5 سال تک اپنے عہدے پر رہیں گے۔وزارت پارلیمانی امور کی جانب سے جاری کیے گئے نوٹیفکیشن کے مطابق آئین پاکستان کے آرٹیکل 48 کے ساتھ 213 اور 215 پر عمل کرتے ہوئے صدر مملکت ڈاکٹر عارف علوی نے سکندر سلطان راجا کو بطور چیف الیکشن کمشنر تعینات کردیا۔نوٹیفکیشن کے مطابق چیف الیکشن کمشنر کی مدت ملازمت 5 سال ہوگی اور اس پر عملدرآمد دفتری امور سنبھالنے کے


دن سے ہوگا۔اس کے ساتھ ہی الیکشن کمیشن کے دیگر 2 اراکین سندھ سے نثار درانی اور بلوچستان سے شاہ محمد جتوئی کی تعیناتی کا نوٹیفکیشن بھی جاری کردیا گیا۔خیال رہے کہ 21 جنوری 2020 کو الیکشن کمیشن کے سربراہ اور اراکین کے تقرر کے معاملے پر طویل ترین ڈیڈلاک اور مختلف مشاورتی اجلاسوں کے بعد بالآخر حکومت اور اپوزیشن کے درمیان چیف الیکشن کمشنر کے لیے سکندر سلطان راجا کے نام پر اتفاق ہوگیا تھا۔دیگر 2 اراکین کے لیے نثار احمد اور شاہ محمد جتوئی کے نام پر دونوں فریقین نے اتفاق کیا تھا۔سکندر سلطان راجا یکم دسمبر 1959 کو پنجاب میں پیدا ہوئے اور 4 جون 1987 کو ملازمت شروع کی۔وہ اپنی سروسز کے دوران مختلف عہدوں پر رہے اور 22 ویں گریڈ سے کچھ ماہ قبل ہی بطور سیکریٹری ریلوے ریٹائرڈ ہوئے جبکہ وہ آزاد جموں و کشمیر اور گلگت بلتستان کے پیٹرولیم سیکریٹری اور چیف سیکریٹری کے طور پر بھی خدمات انجام دے چکے ہیں۔اس کے علاوہ وہ ڈائریکٹر جنرل (پاسپورٹس) بھی رہے اس وقت چوہدری نثار علی خان وزیر داخلہ تھے۔انہوں نے صوبائی سیکریٹری آف کمیونکیشن اینڈ ورکس، سروسز اور جنرل ایڈمنسٹریشن کے فرائض بھی انجام دیے، اس کے علاوہ وہ مختصر مدت کے لیے پنجاب میں ایڈیشنل چیف سیکریٹری تعینات ہونے سے قبل بلدیاتی حکومت کے سیکریٹری بھی رہے۔آپ، سعید مہدی کے داماد ہیں، جو سابق وزیراعظم نواز شریف اور اسلام آباد کے چیف کمشنر عامر احمد علی کے برادر نسبتی کے پرنسپل سیکریٹری رہ چکے ہیں اور آج کل عمران خان کے کافی قریبی سمجھے جاتے ہیں۔سکندر سلطان راجا کے والد آرمی افسر تھے جبکہ ان کی اہلیہ رباب سکندر پاکستان کسٹمز میں 21 ویں گریڈ کی افسر ہیں۔

موضوعات: