اسلام آباد( آن لائن )وزیر اعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیر اعظم عمران ریلوے کی ترقی و بحالی کیلئے پر عزم ہیں ، ایک سال کے قلیل عرصہ میں اضاخیل ڈرائی پورٹ کا پایہ تکمیل تک پہنچنا وزیر ریلوے اور انکی ٹیم کی محنت اور مخلصانہ کاوشوں کا منہ بولتا ثبوت ہے ۔ہفتہ کو سماجی رابطوں کی ویب سائٹ ٹویٹر پر اپنے ٹویٹ میں انہوں نے کہا کہ کراچی سے پشاور ایم ایل ون منصوبہ ، پندرہ مال بردار اور نئی مسافر ٹرینوں کا چلنا نئے پاکستان میں بدلتے ہوئے ریلوے
کا مظہر ہے ۔ ریلوے ملک کی معیشت کی مضبوطی میں کلیدی کردار ادا کرتا ہے ۔ وزیر اعظم کا وژن ہے کے قوموں کی ترقی اور ملکی معیشت میں ریل روڈ نیٹ ورک ریڑھ کی ہڈی کی حیثیت رکھتے ہیں۔ انہوں نے کہا کہ اضا خیل نوشہرہ ریلوے ڈرائی پورٹ کا قیام تجارتی سرگرمیوں کے فروغ اور روز گار نئے مواقع پیدا کرنے میں اہم ثابت ہوگا ۔ جدید ترین سہولیات سے لیس یہ پورٹ نہ صرف عوام اور تاجروں کی ضروریات پوری کرے گا بلکہ مال برداری کی نقل حمل میں بہت آسانیاں پیدا ہونگی۔
