کوئٹہ(این این آئی)امیرجماعت اسلامی پاکستان سینیٹرسراج الحق نے کہاکہ ملک میں اس وقت غیریقینی صورتحال کے سبب عوام پریشان ہیں۔ حکمرانوں نے بلوچستان سمیت پورے ملک کویرغمال بنارکھاہے۔بلوچستان کے مسائل کو مرکزی سطح پر سنجیدگی سے نہیں لیاگیابلوچستان کی پسماندگی کی اصل وجہ اقتدارپرستوں کے اپنے ذاتی مفادات ہیں۔بلوچستان کے عوام کے حقوق کا تحفظ جماعت اسلامی کی مخلص قیادت ہی حل کر سکتی ہے۔
بلوچستان ماضی میں حکمرانوں کی لوٹ مارکی وجہ سے دیگر صوبوں سے پیچھے رہ گیاہے۔بلوچستان میں غیرجانبدار اور موثراحتساب نہ ہونالمحہ فکریہ ہے۔ان خیالات کااظہارانہوں نے پنجپائی کے دورے کے موقع پر قبائلی رہنما ملک عبد المجید مشوانی اور ملک اسرارمشوانی کی طرف سے اپنے اعزاز میں دیے گئے استقبالیہ سے خطاب کرتے ہوئے کیا۔تقریب میں،صوبائی امیر مولانا عبد الحق ہاشمی،ملک عبد المجید مشوانی ملک ا سرارمشوانی،حاجی رازق مشوانی میجرریٹائرڈنورمحمدمشوانی،حاجی حمیداللہ مشوانی،جے آئی یوتھ کے مرکزی نائب صدرجمیل احمدمشوانی،حاجی صدیق مشوانی سمیت قبائلی عمائدین نوجوانوں نے شرکت کی۔ سینیٹرسراج الحق نے کہاکہ ملک کی تین بڑی پارٹیاں آرمی ایکٹ ترمیم پرتومتفق ہوگئیں دیکھنایہ ہے کہ مہنگائی،بے روزگاری ختم کرنے سمیت ملک کے سلگتے مسائل کے حل کیلئے کب متحدہوں گی۔ انہوں نے کہاکہ بلوچستان قدرتی وسائل سے مالامال انتہائی اہم صوبہ ہے یہاں کے مسائل حل ہونے کے بجائے دن بدن گھمبیر ہوتے جارہے ہیں بلوچستان کے مسائل جماعت اسلامی کی مخلص قیادت ہی حل کرسکتی ہے۔ وسائل کی فراہمی سمیت وفاق نے سی پیک میں بلوچستان کویکسرنظراندازکردیاہے گیس بلوچستان سے نکل کر پورے ملک کے عوام کو ایندھن فراہم کرتی ہے لیکن بلوچستان کانوے فیصد حصہ اس سہولت سے محروم ہے جن علاقوں کو گیس فراہم کی گئی ہے وہاں بھی پریشر نہ ہونے کی وجہ سے عوام گیس کے بھاری بھرکم بلوں سے پریشان ہیں بلوچستان میں بلزادائیگی کے باوجودصرف چند گھنٹے بجلی کی فراہمی افسوس ناک ہے
حکومت صوبے کے دیرینہ سلگتے مسائل کے حل پر سنجیدگی سے توجہ دے۔ بلوچستان ترقی کریگاتوپاکستان کی معیشت مستحکم ہوگی۔انہوں نے مطالبہ کیا کہ صوبے کی بڑی شاہراہوں کودورویہ کرنے کے ساتھ کوئٹہ پنجپائی براستہ اغبرگ منصوبے کو صوبائی حکومت کی جانب سے پی ایس ڈی پی سے نکالنا افسوس ناک ہے اس منصوبے پرجلدکام شروع کیاجائے۔تقریب سے ملک مجیدمشوانی ملک اسرارمشوانی،ملک مقبول مشوانی حاجی رازق مشوانی اور جمیل احمدمشوانی نے خطاب کرتے ہوئے سینیٹرسراج الحق کوپنجپائی پر خوش آمدید کہتے ہوئے کہاکہ ہم ہرقسم کے تعاون کیلئے تیار ہیں پنجپای میں مشوانی قوم کے ساتھ ساتھ دیگر اقوام بھی آباد ہیں ہمیں اتحاواتفاق کا مظاہرہ کرتے ہوئے آئندہ انتخابات میں مخلص نیک نام نمائندوں کا انتخاب کرناہوگاتاکہ ہم مسائل کے گرداب سے نکل سکیں۔
