اسلام آباد (این این آئی) پاکستان پیپلز پارٹی نے آرمی ایکٹ ترمیمی مسودہ میں اصلاحات کے لئے ترامیم جمع کراتے ہوئے کہاہے کہ توسیع کے معاملہ پر وزیر اعظم پارلیمانی قومی سلامتی کمیٹی کو اعتماد میں لیں۔ پیر کو پاکستان پیپلز پارٹی کے چیئر مین بلاول بھٹو زرداری کی زیر صدارت پارلیمانی پارٹی کے اجلاس کے بعد میڈیا سے گفتگو کرتے ہوئے قومی اسمبلی میں پیپلزپارٹی کی چیف وہپ شازیہ مری نے کہاکہ ہم نے آرمی ایکٹ ترمیمی مسودہ میں اصلاحات کے لئے ترامیم جمع کرائی ہیں۔شازیہ مری نے کہاکہ ہم نے تجویز کیا کہ توسیع کے معاملہ پر

وزیر اعظم پارلیمانی قومی سلامتی کمیٹی کو اعتماد میں لیں۔ شازیہ مری نے کہاکہ حکومت نے ہمارے ارکان کی تکنیکی معاملات میں الجھا دیا، حکومت کہتی ہے کہ پیپلز پارٹی کی ترامیم آئین کے آرٹیکل 243 اور 175 میں ترمیم سے متعلق ہیں۔ انہوں نے کہاکہ ایکٹسٹنشن اور قواعد و ضوابط میں ترمیم کا معاملہ ہے۔ ذرائع کے مطابق (ن)لیگ نے ترامیم پر پیپلز پارٹی سے رابطہ کیا ہے۔جس پر شازیہ مری نے تصدیق کی کہ بعض اپوزیشن جماعتوں نے ہم سے رابطہ کیا ہے،ہماری ترامیم کے حوالے سے قومی اسمبلی کے فلور پر بات ہوسکتی ہے۔