لاہور(این این آئی )  وزیر محنت و انسانی وسائل پنجاب انصرمجید خان نے کہاہے کہ ای سی ایل میں وزیراعظم کا نام کے خواب دیکھنے والے اپنا نام تو پہلے نکلوا لیں،جس کی کشتی عوام کے ووٹوں کی طاقت سے اُبھری ہو اُس کو نااہل سیاستدان ڈبو نہیں سکتے۔مولانا صاحب دھرنا ناکام ہونے کے بعد

بھی اپنی حرکتوں سے باز نہیں آ رہے۔اپنے ایک بیان صوبائی وزیرانصرمجید خان نے مزیدکہاکہ مڈٹرم الیکشن نہ ہوں گے، نہ ہی اپوزیشن کی دال گلنے والی ہے۔تمام اتحادی جماعتیں پی ٹی آئی کے ساتھ کھڑی ہیں اور حکومت کا حصہ ہیں۔اپوزیشن جماعتوں کو ملک میں تبدیلی لانے کیلئے حکومت کا ساتھ دینا چاہیے۔عوام نے مفادات کی سیاست کی خاطر اپنا ضمیر بیچنے والوں کو مسترد کر دیا۔انصرمجید خان نے کہاکہ تحریک انصاف کی حکومت تمام تر الزام تراشیوں کے باوجود ملک میں ترقی کا سفر جاری رکھے گی۔عوام کے حقوق پر شب خون مارنے والے آج آئین اور قانون کی حکمرانی کے لیکچر دے رہے ہیں۔جھوٹ اور فریب کی سیاست نے کرپٹ سیاستدانوں کا دامن داغدار کر دیا۔انہوں نے کہاکہ کرپٹ عناصر اپنی بے گناہی ثابت کرنے میں مکمل طور پر ناکام ہوچکے ہیں۔کرپٹ سیاستدانوں کے گناہوںکو چھپانے کیلئے ان کے چمچے شعلہ بیانیوں سے باز آجائیں۔‎

موضوعات:مولانا فضل الرحمان