اسلام آباد(این این آئی)ایوانِ صدر کے دروازے عام عوام کے لیے کھول دیئے گئے ہیں۔صدر پاکستان کے آفیشل ٹوئٹر اکاؤنٹ سے جاری بیان کے مطابق ایوانِ صدر ہفتہ کو دوپہر ڈھائی بجے تک عوام کے لئے کھلا رہا اور ایوانِ صدر میں داخلے کے لیے سیکیورٹی کے انتہائی سخت انتظامات کیے گئے ہیں۔ایوان صدر میں داخلے
کے خواہش مند افراد کو شناختی کارڈ ساتھ لے کر آنا لازمی قرار دیا گیا، اس کے بغیر ایوانِ صدر میں داخلے کی اجازت نہیں دی گئی ۔اس کے علاوہ ایوانِ صدر میں جانے کے لیے عام عوام کو موبائل فونز اور بیگ ساتھ لے جانے کی اجازت نہیں تھی۔خیال رہے کہ گزشتہ برس دسمبر میں بھی ایوان صدر کو عام عوام کے لیے کھولا گیا تھا۔
