اسلام آباد (مانیٹرنگ ڈیسک) سابق وزیراعظم میاں نواز شریف کو بیرون ملک جا کر سیاسی پناہ حاصل کرنے کا منصوبہ، یہ بات معروف صحافی صابر شاکر نے ایک نجی ٹی وی چینل کے پروگرام میں کہی، انہوں نے کہاکہ میاں نواز شریف بیرون ملک جا کر سیاسی پناہ حاصل کرنے کا ارادہ رکھتے ہیں، معروف صحافی نے کہا کہ اس منصوبے کے متعلق حکومت کو معلوم ہو گیاتھا

جس کی وجہ سے حکومت نے ن لیگ کے قائد نواز شریف کو بیرون ملک بھیجنے سے قبل ایسے اقدامات کرنے کا فیصلہ کیا جس سے سابق وزیراعظم کی وطن واپسی کو یقینی بنایا جا سکے۔ اسی وجہ سے حکومت نے میاں نواز شریف کو بیرون ملک بھیجنے کے لیے مشروط اجازت دی ہے، معروف صحافی نے کہاکہ میاں نواز شریف کو بیرون ملک سیاسی پناہ سے روکنے کے لیے حکومت نے فیصلہ کیا ہے کہ وہ جس ملک بھی جائیں گے، وہاں کے سفارتی حکام کو ایک خط بھیجا جائے گا جس میں یہ بتایا جائے گا کہ یہ ایک سزا یافتہ مجرم ہیں اور ان کو بیرون ملک صرف علاج کی غرض سے بھیجا گیا ہے۔دوسری جانب پاکستان مسلم لیگ (ق) کے سربراہ چوہدری شجاعت حسین نے کہاہے کہ نواز شریف کے باہر جانے پر جو طوفان شروع ہوا ہے،اسے عمران خان کو قابو کرنا پڑیگا، زندگی موت اللہ تعالیٰ کے ہاتھ میں ہے،عمران خان ماتھے پر وہ کلنک کا ٹیکا نہ لگنے دیں جسے دھونا مشکل ہو جائیگا۔ ایک بیان میں چوہدری شجاعت حسین نے کہاکہ نواز شریف کے باہر جانے پر جو طوفان شروع ہوا ہے اسے عمران خان کو قابو کرنا پڑیگا۔انہوں نے کہاکہ جیسے کہ میں پہلے بھی کہہ چکا ہوں کہ زندگی موت اللہ تعالیٰ کے ہاتھ میں ہے عمران خان کو اللہ تعالیٰ نے موقع دیا ہے اور ملک کا سربراہ ہونے کی حیثیت سے اپنے اچھے فیصلوں میں ایسے لوگوں کی مت سنے جو اس میں مینگنں ڈالنے کی کوشش کر رہے ہیں۔ چوہدری شجاعت حسین نے کہاکہ عمران خان ماتھے پر وہ کلنک کا ٹیکا نہ لگنے دیں جسے دھونا مشکل ہو جائے گا۔ انہوں نے کہاکہ صاحبِ اقتدار لوگوں کو چاہیے کہ وہ اپنی توانائی مہنگائی اور بے روزگاری ختم کرنے پر صرف کریں۔