اسلام آباد (مانیٹرنگ ڈیسک) جمعیت علمائے اسلام کے رہنما مفتی کفایت اللہ سے جب ایک نجی ٹی وی کے پروگرام میں سوال کیاگیا کہ آپ کے دھرنے میں خواتین کیوں شامل نہیں ہیں، جس کے جواب میں مفتی کفایت اللہ نے کہا کہ ہم حالت جنگ میں ہیں، ہم پر شیلنگ ہو گی، ہمیں گرفتار کیاجائے گا،

ہمیں مارا جائے گا تو ہم خواتین کو مروائیں، اس موقع پر مفتی کفایت اللہ نے کہا کہ جب عمران خان استعفیٰ دے گا تو جشن منانے کے لیے ہم خواتین کو لائیں گے، ہماری خواتین ایم این اے، ایم پی اے اور سینیٹرز ہیں، دوسری جانب جے یو آئی کے مرکزی رہنما مفتی کفایت اللہ نے کہا ہے کہ ہماری تحریک انصاف والوں سے قربت نہیں، اس وقت چوہدری برادران ہی مثبت کردار ادا کر سکتے ہیں، چوہدری برادران قوم کو بحران سے نکالتے ہیں تو یہ ان کا قوم پر بہت بڑا احسان ہو گا۔میڈیا سے گفتگو کرتے ہوئے مفتی کفایت اللہ نے کہا کہ ہم نے تمام راستے کھلے رکھنے ہیں، ایک آپشن ہے کہ تمام اپوزیشن جماعتیں پارلیمنٹ سے مستعفی ہو جائیں تو نئے انتخابات ہو سکتے ہیں۔انہوں نے کہا کہ دوسرا آپشن ہے کہ احتجاج ملک بھر میں پھیلا دیا جائے اور لاک ڈاؤن کر دیا جائے، شاہراہیں بند ہوں گی، کاروبار ٹھپ ہو گا تو حکمران مجبور ہو جائیں گے۔انہوں نے کہاکہ اس طرح بھی ہو سکتا ہے کہ ہفتے میں دو تین دن لاک ڈاؤن کیا جائے اور تین دن حالات معمول پر رکھے جائیں اور یہ بھی تجویز ہے کہ ڈی چوک چلے جائیں۔اسلام آباد میں سرد موسم کے باعث دھرنے کے شرکاء کو درپیش مشکلات کے حوالے سے بات کرتے ہوئے مفتی کفایت اللہ نے کہا کہ ہم نکلے ہی کفن باندھ کر ہیں، بارش، برفباری اور گرمی انقلابی لوگوں کے لیے کوئی مسئلہ نہیں ہے۔

موضوعات:مفتی کفایت اللہ