لاہور(این این آئی) مسلم لیگ(ن)پنجاب کی ترجمان عظمی بخاری نے کہا ہے کہ صوبائی وزیر اطلاعات اسلم اقبال آپ منشیات فروشوں کی سرپرستی کریں قوم کی سرپرستی آپ کے بس کی بات نہیں،14ماہ میں آپ کی حکومت نے تبدیلی کا جنازہ نکال دیا ہے،پنجاب میں اربوں روپے کا ترقیاتی بجٹ مختص کیا گیا
لیکن پورے صوبے میں ایک گلی بھی نہیں بنا سکے،حکومتی وزیر اور مشیر اپنے انتخابی اخراجات پورے کرنے میں مصروف ہیں۔عظمی بخاری نے صوبائی وزیر اطلاعات اسلم اقبال کی پریس کانفرنس پر ردعمل کااظہارکرتے ہوئے کہاکہ عمران خان عوام کے ووٹوں سے نہیں چور دروازے سے اقتدار تک پہنچے ہیں۔عمران خان اگر منتخب وزیراعظم ہیں تو دھرنہ ختم کرانے کیلئے غیر جمہوری قوتوں کا سہارا کیوں لے رہے ہیں؟،مولانا صاحب کا دھرنہ دیکھ کر حکومتی اتحادی بھی ان کا ساتھ چھوڑ چکے ہیں۔ انہوںنے کہاکہ چوہدری برادران وزیراعظم کے کہنے پر نہیں کسی اور کے کہنے پر مولانا صاحب سے ملے ہیں۔رہبر کمیٹی نے معاہدے کی پاسداری کی ہے پانچ دن سے دھرنے کے شرکااپنی جگہ پر بیٹھے ہیں۔سلیکٹڈ وزیراعظم کا جانا اب طے ہو چکا ہے ان کی سپورٹ کرنے والے قوم سے غداری کے مرتکب ہونگے۔عمران خان کو این آر او دینے کا مطلب کمزور پارلیمنٹ کو برقرار رکھنا ہے۔
