اسلام آباد (مانیٹرنگ ڈیسک)معروف رہنما جان اچکزئی نے انکشاف کیا کہ اس وقت دو جہاز تیار ہیں۔ انہوں نے کہا کہ میری اطلاع یہی ہے کہ دو جہاز پہلے دن سے تیار کھڑے ہیں۔ ایک سعودی جہاز ہے جو اس وقت لندن میں موجود ہے وہ کسی بھی وقت آ سکتا ہے اور نواز شریف کو لے جا سکتا ہے۔

یا پاک ون ، جو وزیراعظم کا جہاز ہے ، وہ بھی جا سکتا ہے۔یہ تمام چیزیں طے ہو چکی ہیں اب صرف دیکھنا یہ ہے کہ مریم نواز بھی ان کو جوائن کریں گی یا نہیں اور شہباز شریف بھی ان کو جوائن کر سکتے ہیں۔ جان اچکزئی نے کہا کہ نواز شریف آئندہ 48 گھنٹوں میں ملک سے باہر جا سکتے ہیں۔ اس وقت ایک خدشہ ہے کہ اگر نواز شریف کو کچھ ہو گیا تو اس کی ذمہ داری براہ راست حکومت پر آئے گی۔انہوں نے کہا کہ اس وقت دو جہاز تیار ہیں اور دونوں ہی میاں برادران کے لیے تیار ہیں۔اگر ایک جہاز موجود نہیں تو دوسرا جہاز انہیں لے جائے کیونکہ نواز شریف کی صحت سے متعلق خدشات لاحق ہیں۔ انہوں نے بتایا کہ جب یہ لوگ باہر جائیں گے تو ان کا بیانیہ صفر ہو کر رہ جائے گا کیونکہ یہ لوگ خود یہ راستہ منتخب کر کے باہر جا رہے ہیں۔ ماضی میں تو یہ ہوتا تھا کہ یہ سمجھ رہے تھے کہ ہمیں مشرف نے زبردستی باہر بھیج دیا تھا۔ جان اچکزئی نے کہا کہ مولانا فضل الرحمان چاہیں گے کہ کوئی آ جائے اور ان کی مدد کرے ، مولانا فضل الرحمان فیس سیونگ کی کوشش کر رہے ہیں ، انہوں نے چوہدری شجاعت حسین سے بھی رابطہ کر لیا ہے۔انہوں نے پنجاب میں آزادی مارچ کا مجمع اکٹھا نہ ہونے سے متعلق سوال کے جواب میں کہا کہ مسلم لیگ ن اس وقت عملی طور پر شہباز شریف کے ہاتھ میں ہے کیونکہ نواز شریف بیمار ہیں، شہباز شریف نہیں چاہتے تھے مولانا کا مجمع اتنا بڑھ جائے کہ وہ مسلم لیگ ن کے گڑھ سے بھی لوگ نکال لیں۔

موضوعات:جان اچکزئی