پشاور(این این آئی)عوامی نیشنل پارٹی کے مرکزی صدر اسفندیار ولی خان نے سابق وزیراعظم میاں محمد نواز شریف اور سابق صدر آصف علی زرداری کے صحت کے حوالے سے خبروں پر تشویش کا اظہار کرتے ہوئے کہا ہے کہ میاں محمد نواز شریف کی تشویشناک حالت میں ہسپتال منتقلی اورکیپٹن صفدر کی گرفتاری افسوسناک ہے،حکومتی ترجمان کا میاں محمد نواز شریف کے صحت بارے پھر یہ کہنا کہ
وہ ہشاش بشاش تھے شریف خاندان کے ساتھ حکومت اور دیگر اداروں کی ذاتی عناد کی غمازی کرتا ہے۔سماجی رابطوں کے ویب سائیٹ ٹوئیٹر پر میاں محمد نواز شریف اور آصف علی زرداری کے صحت بارے ٹوئیٹس کرتے ہوئے اسفندیار ولی خان نے کہا کہ آج حکومتی ترجمان کی طرف سے جس طرح میاں محمد نواز شریف کی بیماری کا مذاق اُڑا یا جارہا ہے اسی طرح مرحومہ کلثوم نواز کی بیماری کا مذاق بھی اُڑایا جاتا تھا،صحت معاملات کو سیاست کیلئے استعمال کرنا غیر انسانی رویہ ہے۔اسفندیار ولی خان نے مزید کہا کہ سابق صدر آصف علی زرداری کی بیماری کو بھی دباؤ ڈالنے کیلئے استعمال کیا جارہا ہے،آصف علی زرداری کے صحت کے حوالے سے بھی پاکستان پیپلز پارٹی کے تحفظات دور کیے جائے۔انہوں نے کہا کہ نیب کو سیاسی انتقام کے طور پر استعمال کرنے والوں کا بھی ایک دن احتساب ہوگا،آزادی مارچ کے نزدیک آتے ہی حکومت بوکھلاہٹ کا شکار ہوگئی ہے،اپوزیشن قائدین کی بیماری کو آزادی مارچ ناکام بنانے کیلئے استعمال کیا جارہا ہے،حکومتی رویے پر افسوس ہی کیا جاسکتا ہے،یہ ہرگز ملک و قوم کے مفاد میں نہیں ہے۔اسفندیار ولی خان نے مزید کہا کہ مشکل کی اس گھڑی میں اے این پی زرداری اور شریف خاندان کے ساتھ کھڑی ہیں،اے این پی سیاست میں ذاتی عناد کے خلاف ہیں اور جو لوگ اس طرح کے ہتکھنڈے استعمال کررہے ہیں ان کی حقیقت عیاں ہوچکی ہیں۔
