اسلام آباد (مانیٹرنگ ڈیسک)بھارت کی ریاست کیرالہ کا رہائشی نوجوان نوشاد ایک کلو گرام سونا سمگل کرنے کی کوشش میں پکڑا گیا۔میڈیا رپورٹس کے مطابق نوشاد نے سونا سمگل کرنے کا انوکھا طریقہ اپنایا،اس نے اپنے سر کے اوپری حصے کے تقریباََ تمام بال کاٹ کر سونا رکھنے کی جگہ بنائی۔ نوشاد نے سونے کو ایک کالے کاغذ میں لپیٹ کر اپنے سرپر رکھا اور وگ کو سر پرپہن لیا تا کہ کسی کو معلوم نہ ہو سکے
کہ اس کے سر کے اوپر ایک کلو سونا پڑا ہوا ہے۔تاہم جب نوشاد شارجہ سے کیرالہ پہنچا تو ائیرپورٹ انتظامیہ کو اس پر شک گزرا جس کے بعد انتظامیہ نے اس سے پوچھ گچھ کی اور تلاشی کے دوران اس کے سرپر موجود وگ کے نیچے سے ایک کلو سونا برآمد ہوا۔ انتظامیہ نے نوشاد کو حراست میں لے لیا اور اس کے خلاف قانونی کارروائی کی جارہی ہے جبکہ نوشاد سے مزید پوچھ گچھ بھی جاری ہے۔ مزید انکشافات متوقع ہیں۔
