اسلام آباد (این این آئی)وزیراعظم عمران خان سے چینی سنٹرل ملٹری کمیشن کے وائس چیئرمین جنرل ژو کیانگ نے ملاقات کی جس میں باہمی دلچسپی کے امور سمیت دو طرفہ تعلقات پر تبادلہ خیال کیا گیا۔منگل کو جاری اعلامیہ کے مطابق جنرل ڑو کیانگ اعلیٰ سطح کے وفد کے ہمراہ پاکستان کے دورہ پر ہیں۔وزیراعظم نے جنرل ڑو کیانگ کو مقبوضہ کشمیر پر بھارت کے غاصابنہ قبضے اور غیرقانونی اقدامات سے آگاہ کیا۔وزیر اعظم عمران خان نے کہا کہ پاک چین سدا بہار دوستی اور اسٹریٹیجک پارٹنرشپ خطے میں امن کی ضامن ہے۔

انہوں نے کہا کہ 3 ہفتوں سے مقبوضہ کشمیر میں مکمل لاک ڈاؤن ہے اور انسانی حقوق پامال کئے جا رہے ہیں۔انہوں نے کہا کہ بھارتی اقدامات امن کے لئے خطرہ ہیں،بھارت اپنے غاصبانہ اقدامات سے نظر ہٹانے کے لئے جھوٹا پراپیگنڈا کر سکتا ہے۔اعلامیہ کے مطابق وزیراعظم نے اقوام متحدہ میں مسئلہ کشمیر کی حمایت پر چین کا شکریہ ادا کیا۔وزیر اعظم نے کہا کہ مقبوضہ کشمیر سے کرفیو فی الفور اٹھانا چاہیے۔انہوں نے کہا کہ انسانی حقوق کی عالمی تنظیموں کو صورت حال کے جائزے کے لئے مقبوضہ کشمیر تک رسائی دی جائے۔