اسلام آباد (آن لائن)پیپلز پارٹی کے چیئرمین بلاول بھٹو زرداری آج پیر کو اپوزیشن جماعتوں کی اے پی سی میں شرکت نہیں کریں گے اور پہلے سے طے شدہ پروگرام کیمطابق سکردو روانہ ہوں گے جبکہ یوسف رضا گیلانی، نیئر بخاری، شیری رحمان اور فرحت اللہ بابر پر مشتمل وفد اے پی سی میں پیپلز پارٹی کی نمائندگی کرے گا۔ میڈیا رپورٹس کے مطابق پیپلز پارٹی کے چیئرمین بلاول بھٹو زرداری اپوزیشن کی آل پارٹیز کانفرنس میں شرکت نہیں کریں گے۔ بلاول بھٹو پہلے سے طے شدہ پروگرام کے تحت گلگت بلتستان کے دورے پر سکردو روانہ ہوں گے۔ بلاول
بھٹو زرداری نے اے پی سی شرکت کرنیوالے وفد کے ناموں کی منظوری دے دی ہے جس کے مطابق سابق وزیراعظم یوسف رضا گیلانی، نیئر بخاری، شیری رحمان اور فرحت اللہ بابر پر مشتمل وفد اے پی سی میں پیپلز پارٹی کی نمائندگی کرے گا۔واضح رہے کہ حزب اختلاف سے تعلق رکھنے والی سیاسی و مذہبی جماعتوں کی آل پارٹیز کانفرنس (آج) پیر کو ہو گی۔اسلام آبادمیں ہونے والی اے پی سی کی صدارت جمعیت علمائے اسلام (ف) کے امیر مولانا فضل الرحمان کریں گے۔بتایا گیا ہے کہ حزب اختلاف سے تعلق رکھنے والی جماعتیں مسئلہ کشمیر پر پیدا شدہ صورتحال پہ غور و خوص کریں گی۔ اے پی سی میں سینیٹ میں ناکام ہونے والی تحریک عدم اعتماد کے اثرات کا بھی جائزہ لیا جائے گا۔بتایا گیا ہے کہ اے پی سی میں موجودہ حکومت کے خلاف مشترکہ احتجاجی حکمت عملی طے کرنے کے حوالے سے بھی تبادلہ خیال کیا جائے گا۔دوسری جانب مسلم لیگ (ن)کی ترجمان مریم اور نگزیب نے کہاکہ شہباز شریف اے پی سی میں شرکت نہیں کر سکیں گے۔ترجمان مسلم لیگ (ن)کے مطابق یوم جشن آزادی پر کمر میں چوٹ لگنے کی وجہ سے شہباز شریف کو ڈاکٹر نے مکمل آرام کی ہدایت کی ہے،پارٹی کے سینئر قائدین پر مشتمل وفد (آج) پیر کو اے پی سی میں شرکت کرے گا۔قومی اسمبلی میں پارٹی کے پارلیمانی لیڈر خواجہ آصف، سیکرٹری جنرل احسن اقبال اور سابق سپیکر قومی اسمبلی ایاز صادق وفد میں شامل ہوں گے۔