اسلام آباد (مانیٹرنگ ڈیسک) معروف صحافی ڈاکٹر شاہد مسعود نے ایک نجی ٹی وی چینل کے پروگرام میں انکشاف کیا کہ مریم نواز کے ٹویٹس اور خلائی مخلوق کا واویلا کیسے ختم ہوا، انہوں نے کہا کہ 2018ء میں جب جنوری میں نواز شریف کو نااہل قرار پا چکے تھے اور شاہد خاقان عباسی اس وقت پاکستان کے وزیراعظم تھے، مشرق وسطیٰ کے ایک بڑے ملک سے ایک طیارہ بھیجا گیا اس خصوصی طیارے نے لاہور میں لینڈ کی اور میاں شہباز شریف کو لے کر واپس چلا گیا۔

ڈاکٹر شاہد مسعود نے گفتگو کرتے ہوئے بتایا کہ جب شہباز شریف وہاں پہنچے تو وہاں پہلے سے نواز شریف موجود تھے اس موقع پر حسین نواز بھی وہاں موجود تھے، معروف صحافی نے کہا کہ عرب ملک کے شہزادے نے ان سے ملاقات کی اور اس نے کہا کہ ہم پاکستان میں انتشار نہیں بلکہ استحکام چاہتے ہیں آپ جو کچھ کر رہے ہیں اس سے پاکستان کے معاملات خراب ہو رہے ہیں۔ ڈاکٹر شاہد مسعود نے کہا کہ سارے معاملات شہزادے نے طے کیے اور نواز شریف سیاست سے الگ ہو گئے، ن لیگ کی صدارت شہباز شریف کو دے دی گئی، ڈاکٹر شاہد مسعود نے انکشاف کیا کہ جب میاں نواز شریف، شہباز شریف اور حسین نواز واپس آنے لگے تو عرب شہزادے کے نمبر دو نے حسین نواز کے کان میں کہا کہ اپنی بہن مریم نواز کو کہیں کہ وہ ٹویٹ کم کیا کرے ان کے ٹویٹس کی وجہ سے انتشار پھیلتا ہے، معروف صحافی نے کہا کہ اگلی ہی صبح پاکستان مسلم لیگ (ن) نے انتشار پھیلانے والے تمام معاملات روک دیے، مریم نواز کی جانب سے ٹویٹ کا سلسلہ بھی کم ہو گیا اور خلائی مخلوق کا واویلا بھی ختم ہو گیا۔ معروف صحافی نے مزید انکشاف کرتے ہوئے کہا کہ ان سب کی ملاقات کے بعد پاکستان سے کچھ خاص لوگ خصوصی طیارے کے ذریعے عرب ملک گئے اور جا کر اسی شہزادے سے ملاقات کی اور ان کا شکریہ ادا کیا اور کہا کہ اب آگے ہم سنبھال لیں گے۔