ساہیوال(آن لائن) ساہیوال کے ڈی ایچ کیو ہسپتال میں ایئرکنڈیشنر خراب ہونے سے نرسری میں 3بچے دم توڑ گئے، ورثا انتظامیہ کیخلاف سراپا احتجاج بن گئے، ڈپٹی کمشنر نے بچوں کی اموات کی تحقیقات کا حکم دیدیا۔تفصیلات کے مطابق ساہیوال کے ڈی ایچ کیو ہسپتال کی انتظامیہ نے نااہلی کی انتہا کر دی، شدید گرمی میں خراب ہونے والے ائرکنڈیشنر ٹھیک نہ کرائے، نرسری میں موجود 3شیرخوار دم توڑ گئے، لواحقین نے انتظامیہ کو بچوں کی ہلاکت کا ذمہ دار قرار دیدیا۔
انہوں نے الزام عائد کیا کہ مناسب دیکھ بھال نہ ہونے اور اے سی خراب ہونے سے معصوم جاں بحق ہوئے۔ انھوں نے انتظامیہ کی جانب سے مبینہ طور پر غفلت اور لاپرواہی برتنے پر احتجاج بھی کیا۔دوسری جانب ہسپتال انتظامیہ نے 3بچوں کی ہلاکت کی تصدیق بھی کر دی ہے، ڈپٹی کمشنر میاں زمان وٹو نے ہسپتال کی صورتحال کا جائزہ لینے کیلئے ہنگامی دورہ کیا اور بچوں کی اموات کی تحقیقات کا حکم دیدیا، انہوں نے ایم ایس آفس کا اے سی چلڈرن وارڈ میں لگوا دیا۔
