اسلام آباد(آن لائن) وزارت قانون نے وزیر قانون فروغ نسیم کو ججز کیخلاف ریفرنس کا ماسٹر مائنڈ قرار دینے اور ریفرنس میں ترمیم کی تردید کردی۔ترجمان وزارت قانون و انصاف کی جانب سے جاری بیان میں کہا گیا کہ فروغ نسیم کو ریفرنس بھجوانے کا ماسٹر مائنڈ قرار دینا درست نہیں، ججز کے خلاف شکایت ایف بی آر اور ایسٹ ریکوری یونٹ نے کی تھی،
وزارت قانون کے پاس ججز کے اثاثوں کا جائزہ لینے کا کوئی طریقہ نہیں اور وہ موصول ہونے والی شکایات پر کام کرنے کی پابند ہے۔ وزارت قانون نے ججزکیخلاف صدارتی ریفرنس میں ترمیم کی تردید کرتے ہوئے کہا کہ وزارت قانون آئین اور قانون کی بالادستی پر یقین رکھتی ہے اور ریفرنس کو سخت زبان میں کرنے کی خبروں میں صداقت نہیں۔
