کراچی(این این آئی)سندھ ہائیکورٹ نے ریمارکس دیے ہیں کہ اسلام آباد والے ہمارے کسی نوٹس پر کان ہی نہیں دھرتے۔جمعرات کوسندھ ہائی کورٹ میں پیٹرولیم مصنوعات کی قیمتوں میں حالیہ اضافے کے خلاف درخواست کی سماعت ہوئی تو وزارت پیٹرولیم کی جانب سے
جواب جمع نہ کرانے پرعدالت نے برہمی کا اظہار کیا۔جسٹس محمد علی مظہر نے ریمارکس دیئے کہ اسلام آباد سے جواب مانگنا ہمارے لیے تو بڑا مسئلہ بن گیا ہے، اسلام آباد والے سندھ ہائیکورٹ کے کسی نوٹس پر کان ہی نہیں دھرتے، پہلے بھی ایک درخواست پر جواب مانگتے رہے نہیں دیا، سیکرٹری کے وارنٹ گرفتاری جاری کیے پھر جواب جمع کرایا گیا، کیا سیکرٹری پیٹرولیم کو طلب کریں؟۔عدالت نے سماعت ملتوی کرنے کی سرکاری وکیل کی استدعا مسترد کردی۔ جسٹس محمد علی مظہر نے سرکاری وکیل سے کہا کہ پہلے وزرات پیٹرولیم سے معلوم کرکے بتائیں جواب کیوں جمع نہیں کرایا۔ عدالت نے وزارت پٹرولیم، وفاقی حکومت اور دیگر کو نوٹس جاری کردیے۔درخواست گزار مولوی اقبال حیدر نے کہا کہ پارلیمنٹ کی اجازت کے بغیر پیٹرولیم مصنوعات کی قیمتوں میں اضافہ کردیا جاتا ہے، یکم جون کو پھر سے پیٹرولیم مصنوعات کی قیمتوں میں اضافہ کیا جارہا ہے۔
