سکھر /اسلام آباد(آن لائن)بھارتی وزیراعظم نریندر مودی کی تقریب حلف برداری میں وزیراعظم پاکستان کو مدعو نہ پر اپوزیشن کی جانب سے عمران خان کو شدید تنقید کا نشانہ بنایا جارہا ہے۔منگل کو سینئر رہنما پاکستان پیپلز پارٹی خورشید شاہ نے سکھر میں میڈیا سے گفتگو کرتے ہوئے کہا کہ خان صاحب تو بڑے فقیر بن گئے ہیں، انہوں نے جنگی حالات میں بھارتی وزیراعظم نریندر مودی کی جیت کی دعا کی اور وہ الیکشن جیت گئے۔
انہوں نے امید ظاہر کی کہ اب عمران خان مودی سے مذاکرات کے ذریعے مسئلہ کشمیر حل کروا سکیں گے۔پیپلز پارٹی کے رہنما سعید غنی نے ایک بیان میں وزیراعظم کو شدید تنقید کا نشانہ بنایا اور کہا کہ عمران خان مودی کی جیت کے لیے چلہ کاٹتے رہے مگر مودی نے عمران خان کا دل توڑ دیا۔ان کا کہنا تھا کہ مودی کو ابھی نندن کو رہا کرنے کی نیازی کی ادا بھی پسند نہیں آئی ،تاہم عمران خان کا دکھڑا صرف مراد سعید بیان کر سکتے ہیں۔
