اسلام آباد (این این آئی)وفاقی وزیر سائنس اینڈ ٹیکنالوجی فواد چوہدری نے افغانستان سے پاکستانی ٹیم کی شکست پر اپنے ردعمل کا اظہار کرتے ہوئے کہا ہے کہ ابھی باب وولمر کا غم نہیں بھولے ، مجھے تو مکی آرتھر کی فکر ہے ۔سماجی رابطے کی ویب سائٹ ٹوئٹر پر انہوں نے اپنے بیان میں کہا کہ ’’مجھے تو مکی آرتھر کی فکر ہے۔

ابھی باب وولمر کا غم نہیں بھولے‘‘۔دوسری جانب پاکستان تحریک انصاف کے رہنما سینیٹر فیصل جاوید خان نے افغانستان سے پاکستانی ٹیم کی شکست پر اپنے ردعمل کا اظہار کرتے ہوئے کہاہے کہ شکست سے سیکھ کر آپ زیادہ مضبوط ہو سکتے ہیں۔پاکستانی کرکٹ ٹیم کی شکست پر سینیٹر فیصل جاوید کا ٹوئٹر پر اپنے بیان میں کہا کہ ’’وزیر اعظم عمران خان کہتے ہیں کہ گیم میں شکست سے نہیں بلکہ دل برداشتہ ہونے سے تباہی آتی ہے،شکست سے سیکھ کر آپ زیادہ مضبوط ہو سکتے ہیں‘‘۔سینیٹر فیصل جاوید نے پاکستانی ٹیم کی ورلڈ کپ مہم کے لیے نیک خواہشات کا اظہار بھی کیا ہے۔علاوہ ازیںقومی ٹیم کے کپتان سرفراز احمد نے ورلڈ کپ کے وارم اپ میچ میں افغانستان کے خلاف اپ سیٹ شکست پر مایوسی کا اظہار کرتے ہوئے کہا ہے کہ پاکستانی ٹیم نے کم رنز اسکور کیے تھے۔میڈیا سے گفتگو کرتے ہوئے قومی ٹیم کے کپتان نے کہا کہ ہم نے زیادہ رنز نہیں بنائے تھے اور ہمارے کم از کم 20-30 رنز کم تھے جو ناکامی کا بڑا سبب تھا۔انہوں نے کہا کہ کم رنز بنانے کے بعد ہم ابتدائی اوورز میں زیادہ اچھی باؤلنگ نہ کر سکے اور وکٹیں لینے میں ناکام رہے جو شکست کا سبب بنا۔سرفراز احمد نے کہا کہ جب آپ میچ ہار رہے ہوں تو کافی مشکل ہو جاتی ہے اور میں کھلاڑیوں سے کہتا ہوں کہ وہ ہمت نہ ہاریں۔

ہمارا کوچنگ اسٹاف بہت سخت محنت کر رہا ہے اور ہم جلد اچھی کارکردگی کا مظاہرہ کریں گے۔کپتان نے کہا کہ ہماری بیٹنگ اچھی کارکردگی دکھا رہی ہے، آج ہم نے کم رنز اسکور کیے لیکن ہمیں اصل محنت اپنی باؤلنگ پر کرنے کی ضرورت ہے۔سنچری بنانے والے بابر اعظم کے حوالے سے انہوں نے کہا کہ بابر نے اچھی اننگز کھیلی اور یہ ایک اچھی چیز یہ ہے کہ ہمارا سب سے اہم بلے باز مستقل رنز کر رہا ہے۔سرفراز احمد نے کہا کہ ہم نے وہاب ریاض کو ان کی تیز باؤلنگ اور ریورس سوئنگ کی وجہ سے ورلڈ کپ کے اسکواڈ میں منتخب کیا اور انہوں نے میچ میں اچھی کارکردگی کا مظاہرہ کیا۔

موضوعات:فواد چوہدری