اسلام آباد (این این آئی) سپیکر قومی اسمبلی اسد قیصر نے قومی اسمبلی کی 36قائمہ کمیٹیوں کے اراکین کے ناموں کا اعلان کر دیا ہے۔ منگل کو قومی اسمبلی سیکرٹریٹ سے جاری بیان کے مطابق قومی اسمبلی کے 25جنوری کو ہونے والے اجلاس میں پیش کی گئی قرارداد کے تناظر میں قائمہ کمیٹیاں تشکیل دی گئی ہیں، ان قائمہ کمیٹیوں میں قواعد و ضوابط و استحقاق ہاؤس اینڈ لائبریری،

حکومتی یقین دہانیوں کمیٹی، کابینہ سیکرٹریٹ، موسمیاتی تبدیلی، کامرس اینڈ ٹیکسٹائل، مواصلات، دفاع، دفاعی پیداوار، توانائی، وفاقی تعلیم و پیشہ وارانہ تربیت، خزانہ، شماریات و اقتصادی امور، وزارت خارجہ، ہاؤسنگ اینڈ ورکس، انسانی حقوق، اطلاعات و نشریات قومی ورثہ و ادبی تاریخ، انفارمیشن ٹیکنالوجی و ٹیلی کمیونیکیشن، وزارت داخلہ، بین الصوبائی رابطہ، امور کشمیر و گلگت بلتستان، بحری امور، نارکوٹکس کنٹرول، قومی تحفظ خوراک و تحقیق، قومی ہیلتھ سروسز، کوآرڈینیشن اینڈ ریگولیشن، اوورسیز پاکستانیز اور انسانی وسائل کی ترقی، پارلیمانی امور، منصوبہ بندی ترقی و اصلاحات، پوسٹل سروسز، نجکاری، ریلوے، مذہبی امور و بین المذاہب ہم آہنگی، سائنس اینڈ ٹیکنالوجی، سیفران، شماریات اور آبی وسائل کی قائمہ کمیٹیاں شامل ہیں۔ زیادہ تر کمیٹیوں میں قومی اسمبلی کے 20سے زائد ممبران شامل ہیں جن کا تعلق تین بڑی سیاسی جماعتوں پاکستان تحریک انصاف، پاکستان مسلم لیگ (ن) اور پاکستان پیپلز پارٹی سے ہے تاہم بعض کمیٹیوں میں چھوٹی سیاسی جماعتوں اور آزاد امیدواروں کو بھی نمائندگی دی گئی ہے۔