ٹنڈوالہیار (این این آئی)ٹنڈوالہیار میں پولیس چھاپے کے دوران گاوں والوں کے حملے اور فائرنگ سے 11 اہلکار زخمی ہو گئے۔

پولیس کے مطابق یہ واقعہ ٹنڈوالہیار کے علاقے بکیرا شریف میں اس وقت پیش آیا، جب پولیس نے ڈکیتی کے مقدمے میں نامزد ملزمان کی گرفتاری کے لیے گائوں میں چھاپہ مارا۔ملزمان کی جانب سے فائرنگ سے ڈی ایس پی کا گن مین زخمی ہوگیا، جس کو فوری طور پر سول اسپتال حیدرآباد منتقل کر دیا گیا۔ڈی ایس پی کے مطابق گائوں والوں کی جانب سے پتھروں اور اینٹوں کے حملے میں لیڈی اہلکار سمیت 10 پولیس اہلکار بھی زخمی ہوئے۔واقعہ کے حوالے سے ایس ایس پی نے بتایا کہ چند روز قبل 50 لاکھ روپے نقدی اور سامان کی ڈکیتی ہوئی تھی۔

جس کے نامزد ملزمان کی گرفتاری کے لیے پولیس کارروائی کرنے پہنچی تھی۔آئی جی سندھ جاوید عالم اوڈھو نے واقعے کا نوٹس لیتے ہوئے ڈی آئی جی حیدرآباد سے رپورٹ طلب کر لی ہے اور واقعے کی ہر پہلو سے تحقیقات کر کے ملزمان کو جلد گرفتار کرنے کی ہدایت کی ہے۔دریں اثنا پولیس پر حملے کا مقدمہ 50 سے زائد افراد کے خلاف درج کر لیا گیا ہے۔ مقدمے میں 27 کو نامزد کیا گیا ہے جب کہ 25 نامعلوم افراد شامل ہیں۔