ممبئی(این این آئی)بھارتی اداکارہ ریم شیخ شادی کے حوالے سے اپنے خیالات کا اظہار کرنے کے بعد سوشل میڈیا پر خصوصی توجہ کا مرکز بن گئی ہیں۔

ریم شیخ نے حال ہی میں ایک پوڈ کاسٹ میں بطور مہمان شرکت کی جہاں انہوں نے مختلف موضوعات پر گفتگو کی۔پوڈکاسٹ کے میزبان نے ان سے سوال پوچھا کہ کیا اگر آپ کو کسی دوسرے مذہب سے تعلق رکھنے والے آدمی سے محبت ہوگئی تو معاملات پیچیدہ ہو جائیں گے؟اداکارہ نے اس سوال کا بہت واضح انداز میں جواب دیتے ہوئے کہا کہ میں ایسا کر ہی نہیں پاوں گی کیونکہ میں بہت مذہبی انسان ہوں۔

انہوں نے کہا کہ میں 5وقت کی نماز پڑھتی ہوں اور اب میں نے روزے بھی رکھنا شروع کر دئیے ہیں تو مجھے نہیں لگتا کہ میں کسی دوسرے مذہب سے تعلق رکھنے والے آدمی سے شادی کر سکوں گی۔ریم شیخ نے بتایا کہ جب بھی مجھے زندگی میں مشکلات کا سامنا ہوتا ہے تو میں سب سے پہلے اللہ سے مدد مانگتی ہوں، میں اپنی زندگی کسی ایسے شخص کے ساتھ نہیں گزار سکوں گی جو اللہ پر ایمان نہیں رکھتا۔یہاں دلچسپ بات یہ ہے کہ اداکارہ کا ایک ایسے خاندان سے تعلق ہے جہاں ان کی والدہ ہندو اور والد مسلمان ہیں۔ریم شیخ نے کم عمری سے ہی دو مختلف مذاہب کو بہت قریب سے دیکھا اور جانا، ان کا شادی کے حوالے سے واضح موقف ان کی زندگی کے انفرادی سفر کی عکاسی کرتا ہے اور اب وہ خود اسلامی تعلیمات پر عمل کرنے کی کوشش کر رہی ہیں۔