لاہور /نارووال ( این این آئی) وفاقی وزیر ریلویز شیخ رشید احمد نے کہا ہے کہ گردے کی پتھری کاعلاج لندن میں ضروری نہیں ،لال حویلی میں بھی گردے کی پتھری کا دم ہوتا ہے اوردم سے پتھری نکل جاتی ہے، عدالتیں اپنا فیصلہ خود کرتی ہیں، ابھی تو ان سیاستدانوں کے کیسوں کے ڈھیر لگے ہوئے ہیں۔ان خیالات کا اظہار انہوں نے میڈیا سے گفتگو کرتے ہوئے کیا ۔گزشتہ روز وفاقی وزیر ریلویز شیخ رشید نے کلین، گرین اور خوش اخلاق مہم کے دوران لاہور ریلوے سٹیشن کا دورہ کیا اور وہاں تزئین و آرائش کے کام کا بھی جائرہ لیا ۔
کلین، گرین اور خوش اخلاق مہم کے چوتھے روز سی ای او ریلویز آفتاب اکبر اور ڈی ایس ریلوے لاہور عامر نثار چوہدری سمیت ریلوے کے اعلی حکام بھی وزیر ریلویز کے ہمراہ تھے ۔شیخ رشید نے کہا کہ پاکستان ریلویز کی کلین، گرین مہم سٹیشنوں پر بہترین صفائی ستھرائی کے انتظامات کیے گئے۔ شیخ رشید احمد لاہور ریلوے سٹیشن پر قلیوں سے بھی ملاقات کی ۔ وزیر ریلوے شیخ رشید نے صحافی کے سوال کے جواب میں کہا کہ عدالتیں اپنا فیصلہ خود کرتی ہیں،ابھی تو ان سیاستدانوں کے کیسوں کے ڈھیر لگے ہوئے ہیں۔بعد ازاں وفاقی وزیر ریلویز کلین، گرین اور خوش اخلاق مہم کیلئے بذریعہ علامہ اقبال ایکسپریس لاہور سے نارووال، سیاکوٹ سیکشن پر روانہ ہو گئے ۔شیخ رشید احمد نے نارنگ منڈی سٹیشن پر رک کر مسافروں اور اہل علاقہ سے ملے۔اس موق پر شیخ صاحب زندہ باد کے نعروں کی گونج سنائی دی گئی اور بڑی تعداد میں عوام ارد گرد جمع ہو گئے ۔ شیخ رشید نے کہا کہ وزیراعظم عمران خان نے میری ڈیوٹی لگائی ہے دعا کریں کہ ریلوے اپنے تاریخی مقام پہ پہنچ جائے ۔بڑی تعداد میں عوام ٹرین کے ساتھ شیخ رشید احمد کی جھلک دیکھنے کے لیے دوڑتے رہے۔وزیرریلوے شیخ رشید ریلوے سٹیشن کے افتتاح کیلئے نارووال پہنچے ۔
انہوں نے نوازشریف کے گردے میں پتھری کی نشاندہی سے متعلق سوال کا جواب دیتے ہوئے کہا کہ گردے کی پتھری کاعلاج لندن میں ضروری نہیں ،لال حویلی میں بھی گردے کی پتھری کا دم ہوتا ہے۔وزیر ریلوے نے دعویٰ کیا ہے کہ لال حویلی میں دم سے پتھری نکل جاتی ہے،پتھری نکالنے کیلئے لندن جانے کی ضرورت نہیں۔بلاول کے بیان سے متعلق سوال کا جواب دیتے ہوئے شیخ رشید نے کہا کہ بلاول سے کہتا ہوں معافی مانگ لے،اسی میں فائد ہ ہے۔
