اسلام آباد(این این آئی)قومی احتساب بیورو (نیب) نے وزیراعظم عمران خان کے معاون خصوصی عثمان ڈار کو خط لکھ کر ان سے سابق وفاقی وزیر اور مسلم لیگ (ن) کے رہنما خواجہ محمد آصف کی غیر ملکی سرمایہ کاری سے متعلق ثبوت مانگ لیے۔نیب کی جانب سے خواجہ محمد آصف کی مبینہ کرپشن کی تحقیقات کے معاملے میں پیش رفت سامنے آئی اور
بدعنوانی کی تحقیقات کرنے والے ادارے نے عثمان ڈار کو اس حوالے سے خط لکھ دیا۔نیب نے اپنے خط میں خواجہ محمد آصف کی غیر ملکی سرمایہ کاری سے متعلق ثبوت مانگ لیے۔بدعنوانی کی تحقیقات کرنے والے ادارے نے عثمان ڈار کو ذاتی حیثیت میں طلب کیا۔نیب کی جانب سے عثمان ڈار کو لکھے گئے خط میں کہا گیا کہ خواجہ آصف کی غیر ملکی سرمایہ کاری سے متعلق ثبوت فراہم کئے جائیں۔خیال رہے کہ وزیراعظم کے معاون خصوصی عثمان ڈار نے خواجہ آصف کے خلاف تحقیقات کے لیے نیب سے رجوع کیا تھا۔ادھر نیب کے خط کے بعد عثمان ڈار نے نیب حکام کے سامنے پیش ہونے کا فیصلہ کرلیاان کا کہنا تھا کہ خواجہ آصف کی کرپشن، منی لانڈرنگ اور غیر ملکی فنڈگ کے ثبوت دوں گا۔عثمان ڈار نے دعویٰ کیا کہ خواجہ آصف نے بطور وزیر پانی و بجلی قومی خزانے کو بے پناہ نقصان پہنچایااس کے علاوہ خواجہ آصف نے اقامے کی آڑ میں منی لانڈرنگ کی اور کرپشن کے ریکارڈ توڑے۔انہوں نے کہا کہ خواجہ آصف نے وفاقی وزیر ہوتے ہوئے غیر ملکی کمپنیوں میں ملازمت کی۔انہوں نے کہاکہ خواجہ آصف کی کرپشن کے چشم کشا حقائق نیب کے سامنے رکھوں گا۔
