لاہور ( این این آئی) پیپلز پارٹی نے پنجاب میں کسانوں کے حقوق کی تحریک چلانے کا اعلان کرتے ہوئے کہا ہے کہ کسانوں کے استحصال کے خلاف تحریک کا آغاز پانچ دسمبر سے چنیوٹ سے ہوگا۔اس حوالے سے پیپلز پارٹی پنجاب کے سیکرٹری اطلاعات سید حسن مرتضیٰ نے کہا کہ ہم نے فیصلہ کر لیا ہے کہ کسانوں کے ساتھ ہونے والی زیادتیوں پر اب خاموش نہیں رہیں گے،کریشنگ نہ کرنے کے خلاف شوگر ملز مالکان کے خلاف پی پی پی کا پہلا مظاہرہ پانچ دسمبر کو چنیوٹ میں ہوگا۔
جس کی قیادت صوبائی صدر قمر زمان کائرہ کریں گے۔انہوں نے کہا کہ شوگر ملز مالکان کریشنگ کا آغاز نہ کر کے کسانوں کا استحصال کر رہے ہیں، چنیوٹ میں سو سالوں سے زمین کاشت کرنے والے کاشتکاروں کو بے دخل کیا جا رہا ہے، مزارعین سے زمینیں چھین کر سرمایہ داروں کو دینے کی پالیسی بنائی گئی ہے، تمام کاشتکاروں، کسانوں اور ہاریوں سے اپیل ہے کہ وہ اس تحریک میں بھرپور شرکت کریں، ہم سب ملکر اس تحریک کو کامیاب بنا سکتے ہیں، آئیں ہمارا ساتھ دیں۔
