لاہور ( این این آئی) لاہور ہائیکورٹ کے جسٹس شمس محمود مرزار نے وزیر اعظم عمران خان کی نا اہلی کیلئے دائر درخواست پر فل بنچ کی تشکیل کیلئے فائل چیف جسٹس کو بھجوا دی ۔ لاہور ہائی کورٹ کے جسٹس شمس محمود مرزا نے سماعت کی ۔

درخواست گزار کے وکیل نے  استدعا کی کہ اہم نوعیت کا معاملہ ہے عدالت اس پر فل بنچ بنائے۔ جس پر عدالت نے فل بنچ کی تشکیل کے لیے فائل چیف جسٹس کو بھجوا دی۔ آئینی درخواست لائرز فاؤنڈیشن فار جسٹس نے لاہور ہائیکورٹ میں دائر کی ہے جس میں وفاقی حکومت اور وزیر اعظم عمران خان نیازی کو فریق بنایا گیا ہے۔ درخواست میں موقف اختیار کیا گیا ہے کہ نواز شریف کے دور حکومت میں عمران خان سول نافرمانی کے لیے لوگوں کو اکسایا ہے، عمران خان نے لوگوں کو اکسایا کہ وہ ٹیکس نہ دیں اور بیرون ممالک سے رقوم بھی نہ بھیجیں، عمران خان نے حامیوں سمیت پارلیمنٹ کی بلڈنگ پر دھاوا بولا اور اور گیٹ توڑے، عمران خان نے ملکی سالمیت کے خلاف اقدامات کیے ہیں، عمران خان نے ملکی سیاسی نظام کو تباہ کرنے کی کوشش کی ہے۔ معزز عدالت سے استدعا ہے کہ وزیر اعظم عمران خان کو آرٹیکل 62ون جی کے تحت نا اہل کیا جائے اور ان کیخلاف خلاف 124اے کے تحت کاروائی کا حکم دیا جائے ۔