اسلام آباد (مانیٹرنگ ڈیسک) وزیر مملکت برائے مواصلات مراد سعید نے دو ماہ میں ایسی کارکردگی دکھائی کہ ملک کو اس سے اربوں روپے کا فائدہ ہو گیا، ایک نجی ٹی وی چینل کی رپورٹ کے مطابق وزیر اعظم عمران خان کی ہدایت پر شروع کی جانے والی کفایت شعاری کی مہم پر عمل کرتے ہوئے وزارت مواصلات نے مختلف اخراجات کم کرکے ساڑھے 3 ارب روپے کی رقم بچا لی ہے، کفایت شعاری مہم کے تحت اپنی اضافی گاڑیاں وزارت مواصلات نے نیلام کر دی ہیں جبکہ اعزازیہ اور انٹرٹینمنٹ فنڈز بھی ختم کر دیے ہیں۔ قومی خزانے
میں اضافی گاڑیوں کی نیلامی سے حاصل ہونے والے 20 کروڑ 88 لاکھ روپے کی رقم جمع کرا دی گئی ہے، اس کے علاوہ فیول اور مرمت کے کاموں میں کمی کی وجہ سے مزید 52 لاکھ روپے کی بچت ہوئی۔ اس کے علاوہ وزارت مواصلات کی طرف سے تجاوزات کے خلاف آپریشن میں ایک ارب 28 کروڑ روپے وصول کیے گئے اور غیر قانونی ٹھیکے اور گھپلوں میں 40 کروڑ روپے کی ریکوری بھی کر لی گئی ہے۔ وزارت مواصلات کے ذرائع کا کہنا ہے کہ وزارت کی آمدن میں دو ماہ میں 77 کروڑ روپے کا اضافہ ہوا ہے۔
