نارنگ منڈی(این این آئی ) نارنگ منڈی کے علاقہ کالاخطائی ریلوے سٹیشن پر آسیہ مسیح کی رہائی کے خلاف مشتعل مظاہرین سیالکوٹ سے کراچی جانے والی علامہ اقبال ایکسپریس 10ڈاؤن کو زبردستی روکنے کے لیے ریلوے لائن کے درمیان کھڑے ہو گئے جس کے نتیجہ میں ایک عالم دین انجن سے ٹکرانے کے بعد شدید زخمی ہو گیا جسے تشویشناک حالت میں فوری طور پر تحصیل ہیڈ کوارٹر مریدکے ریفر کر دیا گیا ۔مشتعل مظاہرین نے علامہ اقبال کو زبردستی روکنے کے لیے انجن پر پتھراؤ کیا جس کے باعث انجن کے شیشے ٹوٹ گئے اور

ڈرائیور محمد یوسف خون میں لت پت ہو گیا اور اس کا سر پھٹ گیا جبکہ قبل ازیں مظاہرین نے سیالکوٹ سے لاہور جانے والی لاثانی ایکسپریس کو بھی کالا خطائی ریلوے سٹیشن پر ایک گھنٹہ تک روکے رکھا ڈرائیور کو یر غمال بنا لیا اور حکومت کے خلاف زبردست نعرے بازی کی گئی اور اعلان کیا گیا کہ جب تک ہمارے مطالبات تسلیم نہیں کیے جاتے اور آسیہ مسیح کو سزائے موت نہیں دی جاتی ہم کالاخطائی میں احتجاج جاری رکھیں گے ۔واضح رہے کہ دن بھر مظاہرین آھدیاں روڈ، کالاخطائی سدھانوالی روڈ بند کر کے احتجاج کرتے رہے۔