لاہور(این این آئی) وزیراعلیٰ پنجاب سردار عثمان بزدار کی زیر صدارت وزیراعلیٰ آفس میں امن عامہ کی صورتحال کا جائزہ لینے سے متعلق اعلیٰ سطح کا اجلاس منعقد ہوا۔اجلاس میں حالیہ واقعات کے تناظر میں لاہور سمیت پنجاب بھر میں امن وامان کی صورتحال کا تفصیلی جائزہ لیاگیااورعوام کی جان و مال کے تحفظ کیلئے ہر ممکن اقدامات کرنے کے عزم کا اعادہ کیاگیا۔

وزیراعلیٰ عثمان بزدار نے اجلاس سے خطاب کرتے ہوئے کہا کہ پرامن فضا یقینی بنانا ریاست کی بنیادی ذمہ داری ہے ۔صوبے میں امن و امان کا قیام اور عوام کے جان و مال کا تحفظ ہماری اولین ترجیح ہے اور عوام کے جان و مال کے تحفظ کیلئے ہر ضروری قدم اٹھایا جارہا ہے ۔وزیراعلیٰ نے متعلقہ حکام کو ہدایت کی کہ قانون کی عملداری کو ہر قیمت پر یقینی بنایا جائے۔انہوں نے کہا کہ موجودہ حالات غیر معمولی اقدامات کے متقاضی ہیں اور متعلقہ ادارے اسی تناظر میں فول پروف اقدامات یقینی بنائیں۔وزیراعلیٰ نے مزید ہدایت کی کہ اہم مقامات کی سکیورٹی مزید سخت کی جائے اور وضع کردہ سکیورٹی پلان کے تحت ضروری اقدامات کئے جائیں ۔ عثمان بزدار نے کہا کہ پاکستان تحریک انصاف کی حکومت ختم نبوت ؐکے عقیدے پر غیرمتزلزل ایمان رکھتی ہے اور ختم نبوتؐ ہمارے ایمان میں شامل ہے۔انہوں نے کہا کہ ہم چاہتے ہیں کہ معاملات تدبر اور تحمل سے حل ہوں اوراس کیلئے ہماری کوشش ہے کہ افہام و تفہیم کے ساتھ معاملات کو آگے بڑھایا جائے۔ انہوں نے کہا کہ قومی یکجہتی اوراتحاد کو فروغ دینے کی جتنی ضرورت اب ہے پہلے کبھی نہ تھی ،لہٰذا ہم سب کو قومی یکجہتی اورقومی اتحادکو فروغ کیلئے اپنا موثر کردار جاری رکھنا ہے۔انہوں نے کہا کہ ہم پاکستان کی بہتری کی سوچ لے کر آگے چل رہے ہیں۔ وزیراعلیٰ نے کہا کہ علمائے کرام، مشائخ عظام اور مذہبی جماعتوں کے رہنما قومی مفاد میں اپنا موثر کردار ادا کریں۔ اجلاس کے دوران وزیراعلیٰ کو امن عامہ اور سکیورٹی انتظامات کے حوالے سے تفصیلی بریفنگ دی گئی۔صوبائی وزیر قانون راجہ بشارت، وفاقی سیکرٹری داخلہ، چیف سیکرٹری، ڈی جی رینجرز، انسپکٹر جنرل پولیس، ایڈیشنل چیف سیکرٹری داخلہ اور اعلیٰ حکام نے اجلاس میں شرکت کی۔

موضوعات:عثمان بزدار