لاہور(آئی این پی) صوبائی وزیر اطلاعات فیاض الحسن چوہان نے کہاہے کہ حمزہ شہبا زشر یف نے اپنی نگرانی اسمبلی کے اندر بد معاشی اور غنڈہ گردی کروائی ہے ‘ حمزہ شہبازشریف اپنا طریقہ درست کرلیں ہم نے بات کی تو آپ کی چیخیں مریخ تک جائیں گی ‘
ن لیگ نے سیکرٹری اسمبلی پر حملہ کیا ہے اور تاریخ کی بدتر ین بد معاشی کی گئی ہے ‘، وزیر اعظم کی بہن علیمہ خان کے خلاف جو زبان استعمال کی گئی وہ قابل مذمت ہے گھروں تک نہ جائیں اگر ہم نے بات کی تو پھرآپ کو تکلیف ہوگی ۔منگل کو پنجاب اسمبلی کے باہر میڈیا سے گفتگوکرتے ہوئے فیا ض الحسن چوہان نے کہا کہ حمزہ شہباز شریف شیشے کے گھر میں بیٹھ کر دوسروں کے گھر میں پتھر نہیں پھینکتے اگر ہم نے بات کرنا شروع کی تو آپ کی چیخیں نکل جائیں گی ، ن لیگ کی غنڈا گردی کی مذمت کرتے ہیں۔ انہوں نے کہا کہ حمزہ شہباز آپ اپنا طریقہ درست کرلیں ، وزیر اعظم کی بہن علیمہ خان کے خلاف جو زبان استعمال کی گئی وہ قابل مذمت ہے ۔ انہوں نے کہا کہ ن لیگ نے سپیکر صوبائی اسمبلی پر حملہ کرنے کی کوشش کی اور اسمبلی سیکرٹری پر جس طرح حملہ کیا کہ قابل مذمت ہے ۔سیکرٹری اسمبلی پر حملہ حمزہ شہبازکی ایماپر کیا گیا ہے حمزہ شہبازشریف اپنا طریقہ درست کرلیں ، تمام ادارے آزادانہ طور پر کام کر رہے ہیں۔ انہوں نے کہا کہ ن لیگ و الے اب دس روز سے اپنے قائد کا چہرہ نہیں دیکھ سکیں گے ۔
