بیجنگ (این این آئی)چینی وزارت خارجہ نے کہا ہے کہ چین پاکستان کی نئی حکومت کیساتھ چین تیزی سے اپنے تعلقات کو فروغ دے رہا ہے ٗدونوں ممالک مشترکہ کوششوں سے ترقی کے عمل کو جاری رکھیں گے۔میڈیا رپورٹ کے مطابق چینی وزارت خارجہ کے ترجمان لو کھانگ نے پریس کانفرنس کے دوران پاک چین تعلقات پر روشنی ڈالتے ہوئے کہا کہ چین خطے میں اپنے برادر ملک پاکستان کو ہمیشہ فوقیت اور اہمیت دیتا ہے۔ انہوں نے کہاکہ چین پاکستان کے ساتھ تمام شعبہ ہائے زندگی میں
تعلقات کو بلندیوں تک لے جانا چاہتا ہے ۔انہوں نے کہا کہ پاک چین تعلقات میں ہمیشہ بہتری کی گنجائش رہتی ہے،چین پاکستان تعلقات تیزی سے بلندیوں کی جانب گامزن ہیں۔ انہوں نے پاکستانی وزیر اعظم کے دورہ چین کے حوالے سے کئے گئے ایک سوال کا جواب دیتے ہوئے کہا کہ چین اور پاکستان کے مابین اعلیٰ سطحی وفود کے تبادلے جاری ہیں۔ چینی صدر شی جن پھنگ اور وزیر اعظم لی کھ چھیانگ نے عمران خان کو نئے وزیر اعظم بننے پر مبارکباد دی ۔ چینی وزیر خارجہ وانگ ای نے پاکستان کا فوری طور پر دورہ کیا اور اہم شخصیات سے ملاقاتیں کیں۔ چین پاکستان کی نئی حکومت کے ساتھ ملک کر چین پاکستان اکنامک کوریڈور (سی پیک)کے مختلف شعبوں اورمنصوبوں کو تیزی سے مکمل کر رہا ہے۔ ترجمان نے کہا کہ دونوں ممالک مابین ثقافتی وفود کا تبادلہ بھی جاری ہے۔ دونوں ممالک مشترکہ کوششوں سے ترقی کے عمل کو جاری رکھیں گے۔ جنوبی بحیرہ چین کے حوالے سے کئے گئے سوال کے جواب میں ترجمان نے کہا کہ چین کو اپنے دفاع کا حق حاصل ہے، چین کی خود مختاری اور سالمیت کو چیلنج کرنے والے کو بھر پور جواب دیا جائے گا۔
