اسلام آباد (مانیٹرنگ ڈیسک) معروف صحافی سہیل وڑائچ نے ایک نجی ٹی وی چینل کے پروگرام میں میزبان کے ایک سوال کا جواب دیتے ہوئے کہا کہ اس وقت دو منظر نامے ہیں ایک یہ کہ پندرہ سال تک سزائیں چلتی ہیں، مقدمات چلتے ہیں اور یہ جیل میں رہتے ہیں یا پھر احتساب کا سامنا کرنا پڑتا ہے، جس میں شریف خاندان کے لیے کوئی امید نہیں ہے دوسری طرف پاکستان کے سیاسی حالات الٹ پلٹ ہوتے رہتے ہیں کبھی نشیب آتا ہے کبھی فراز آتا ہے،
اس حوالے سے اگر دیکھا جائے اور پوری تاریخ کو سامنے رکھا جائے تو مستقبل ہے ہی مریم نواز کا کیونکہ جو پاکستان میں مشکل کاٹتا ہے اسی کو اقتدار ملتاہے، اسی کے نصیب جاگتے ہیں اور جتنی زیادہ مشکل کاٹتے ہیں تو اتنا بڑاعہدہ ملتاہے،آصف زرداری نو سال جیل رہے اور صدر پاکستان بن گئے، محترمہ بے نظیر بھٹو جیل میں رہیں تو بار بار وزیراعظم بنتی رہیں تو یہ کوئی ایسی حیران کن بات نہیں ہو گی کہ کل کو مریم نواز کا راستہ صاف ہو جائے۔
