اسلام آباد (مانیٹرنگ ڈیسک)تحریک انصاف کی حکومت نے اقتدار سنبھالتے ہی وزیراعظم ہائوس میں موجود لگژری گاڑیوں کے بیڑے کی نیلامی کا اعلان کیا تھا اور اس سلسلے میں باقاعدہ طور پر نیلامی کیلئے تاریخ کا اعلان ہو چکا ہے تاہم گزشتہ روز حکومت کی جانب سے وزیراعظم ہائوس کے 4ہیلی کاپٹر اور اس میں غذائی ضروریات پوری کرنے کیلئے رکھی گئی بھینسیں بھی
فروخت کرنے کا اعلان کر دیا گیا ہے۔تحریک انصاف کے رہنما نعیم الحق نے وزیراعظم ہائوس کی بھینسیں اور ہیلی کاپٹر نیلام کرنے کا اعلان کرتے ہوئے بتایا کہ یہ بھینسیں نواز شریف اور ان کے خاندان کی غذاتی ضروریات پوری کرنے کیلئے وزیراعظم ہائوس میں رکھی گئی تھیں اور ان کے اخراجات سرکاری خزانے سے ادا کئے جاتے تھے۔ بھینسوں کی نیلامی کے اعلان کے بعد حکومت کے اس فیصلے پر خوب ہنسی اڑائی گئی تاہم سرکاری ٹی وی پر نشر ایک رپورٹ کے مطابق ان بھینسوں کو ہلکا نہ لیا جائے کیونکہ یہ بھینسیں پاکستان کی سب سے بہترین نیلی راوی نسل سے تعلق رکھتی ہیں اور ایک بھینس کی قیمت قریبا دو لاکھ روپے ہے۔بھینسوں کی دیکھ بھال اور دودھ کی سپلائی پر 4 افراد کا عملہ مامور ہے۔بھینسوں کی نگرانی پر مامور سپروائزر مقصود چیمہ کا کہنا ہے کہ بھینسوں کی خوراک پر ماہانہ 35ہزار روپے خرچ ہوتے ہیں جب کہ دیگر اخراجات اس کے علاوہ ہیں۔اس کے علاوہ ایک ڈرائیور اور گاڑی بھی ہے جو بھینسوں کے لیے چارا لانے کے لیے استعمال ہوتی ہے۔عملے میں موجود ایک فرد کا کہنا ہے کہ وہ صبح تین بجے سے ان بھینسوں کی دیکھ بھال کرنا شروع کرتا ہے لیکن اسے کبھی خالص دودھ نصیب نہیں ہوا۔واضح رہے کہ بھینسوں کے حوالے سے خبر نئی حکومت کے اقتدار میں آنے کے بعد سامنے آئی تھی اور اس سے پہلے پاکستانی عوام کو اس حوالے سے معلومات نہ تھی کہ وزیراعظم ہائوس میں باقاعدہ غذائی ضروریات پوری کرنے کیلئے ایک فارم ہائوس بھی قائم کر کے رکھا گیا ہے۔
