اسلام آباد(مانیٹرنگ ڈیسک)وزیراعظم عمران خان کی جانب سے نامزد کئے گئے اقتصادی مشاورتی کونسل کے رکن عاطف میاں کو نکالنے پر کونسل کے ایک اور رکن عاصم خواجہ نے بھی استعفیٰ دیدیا۔ تفصیلات کے مطاب سماجی رابطوں کی ویب سائٹ پر وزیراعظم عمران خان کی جانب سے نامزد کئے گئے اقتصادی مشاورتی کونسل کے رکن عاصم خواجہ نے کونسل کی رکنیت سے مستعفی ہونے کا اعلان کرتے ہوئے کہا ہے کہ یہ فیصلہ میرے لئے تکلیف دہ ہے ۔
ان کا کہنا تھا کہ ایک مسلمان کی حیثیت سے اس اقدام کا جواز پیش نہیں کرسکتا جہاں ایسی اقدار پر سمجھوتہ کیا جائے وہاں کام کرنا ممکن نہیں، اللہ ہمیں معاف کرے میری اور ہم سب کی مدد فرمائے جب کہ ملک کی مدد کے لیے ہمیشہ تیارہوں، پاکستان پائندہ باد۔واضح رہے کہ گزشتہ روز وفاقی حکومت کی جانب سے قادیانی عاطف میاں کی کونسل سے برخاستگی کا اعلان کیا گیا تھا۔ حکومت کو عاطف میاں کی نامزدگی پر مذہبی و عوامی حلقوں کی جانب سے شدید تنقید کا سامنا تھا۔
