اسلام آباد(اے این این)چیف جسٹس پاکستان میاں ثاقب نثار نے شاہین ایئر لائنز کو حکم دیا ہے کہ ایک ہفتے میں 2کروڑ روپے عدالت میں جمع کرائیں، شاہین ایئرلائنز کی وجہ سے چین میں پھنسنے والے مسافروں کو ہرجانہ کی ادائیگی کا فیصلہ عدالت کرے گی۔میڈیا رپورٹس کے مطابق شاہین ایئر لائنز کی وجہ سے مسافروں کے چین میں پھنسنے کے نوٹس کی سماعت سپریم کورٹ لاہور رجسٹری میں ہوئی۔شاہین ایئر لائنزکے وکیل نے

عدالت کو بتایاکہ متاثرہ مسافروں کو 3 ماہ کے دوران ایک لاکھ روپے تک ہرجانہ کی ادائیگی کے لئے کمیٹی بنا دی ہے۔اس پر چیف جسٹس میاں ثاقب نثارنے حکم دیاکہ 3 ماہ نہیں، بلکہ ایک ہفتے میں 2کروڑ روپے عدالت میں جمع کرائیں، لوگوں کا جو حق بنتا ہے، وہ دیں، لوگ شاہین ایئر لائنز کی وجہ سے چین میں محبوس ہوئے تھے۔چیف جسٹس نے کہا کہ ہرجانہ بھی ایک لاکھ تک محدود نہیں ہوگا، بلکہ اس کا فیصلہ عدالت کرے گی۔

موضوعات:چیف جسٹس