اسلام آباد (مانیٹرنگ ڈیسک) عون چودھری اور نعیم الحق کو وزیراعظم عمران خان نے ان کی ذمہ داریوں سے سبکدوش کر دیا ہے، ایک موقر قومی اخبار کی رپورٹ کے مطابق گزشتہ روز نعیم الحق کو بنی گالہ جاتے ہوئے عمران خان کی رہائش گاہ کے باہر گیٹ پر ہی روک دیا گیا، رپورٹ کے مطابق جب نعیم الحق تحریک انصاف کے چیئرمین عمران خان سے ملاقات کے لیے پہنچے تو انہیں سکیورٹی اہلکاروں نے گیٹ پر ہی روک لیا اور اندر نہیں جانے دیا۔ جب تحریک انصاف کے رہنما نعیم الحق نے کہا کہ میں عمران خان کو لینے آیا ہوں، تم مجھے
نہیں جانتے تم میرے انڈر ہی کام کرتے رہے ہو، مگر اس موقع پر سکیورٹی اہلکاروں نے بھی ان کی کوئی بات نہ سنی لیکن جب بنی گالہ سے کال آئی تو انہیں اندر جانے کی اجازت دے دی۔ اس کے علاوہ عون چودھری کے بھی بنی گالہ آنے پر پابندی لگا دی گئی ہے۔ عون چودھری کی سبکدوشی کے حوالے سے تحریک انصاف کے ذرائع کا کہنا تھا کہ انہوں نے اپنی اننگ مکمل کر لی ہے، رپورٹ کے مطابق عمران خان کی طویل خدمت کے عوض عون چودھری اپنے بھائی امین چودھری لاہور سے ایم پی اے بنوانے میں کامیاب ہوگئے ہیں۔
