اسلام آباد (این این آئی)پاکستان تحریک انصاف کے رہنما نعیم الحق نے کہا ہے کہ پی ٹی آئی کے مخالفین کی جانب سے تحریک انصاف کی کابینہ کی جعلی فہرستیں گردش کر رہی ہیں۔سماجی رابطے کی ویب سائٹ ٹوئٹر پر اپنے پیغام میں نعیم الحق نے پارٹی کے دشمنوں کو تنبیہ کی کہ

وہ ایسی بدنیتی پر مبنی سرگرمیوں سے گریز کریں۔انہوں نے کہا کہ کابینہ کے متعلق تا حال کسی قسم کا فیصلہ نہیں کیا گیا ہے۔دریں اثناء پاکستان تحریک انصاف کے رہنما بابر اعوان نے کہا ہے کہ پاکستان کو مضبوط کرنے کا طریقہ اداروں کو مضبوط بنانا ہے ٗ ادارے مضبوط تب ہی ہوتے ہیں جب کسی فرد کا عمل دخل نہ ہو، تحریک انصاف کا اداروں کے ساتھ نیا سفر شروع ہو رہا ہے۔میڈیا سے گفتگو کر تے ہوئے انہوں نے کہاکہ الیکشن 2018 آئین کے مطابق ہوئے، پنجاب میں ہمارے پاس اکثریت ہے، پنجاب میں لمبے عرصے بعد عوام اپنی حکومت بنائیں گے۔ انہوں نے کہاکہ وزرا کے ناموں کا فیصلہ صرف عمران خان کریں گے، وزیراعلیٰ پنجاب کا فیصلہ ابھی نہیں ہوا۔بابر اعوان نے کہا کہ فضل الرحمان اور محمود اچکزائی آپس میں فیصلہ کریں دھاندلی کیسے ہوئی، جو جماعتیں الیکشن کا نتیجہ منظور کر کے پارلیمنٹ میں آرہی ہیں بہت اچھی بات ہے۔ انہوں نے کہا کہ عمران خان کی طرف سے الیکشن کمیشن میں پیش ہوا ٗ3 کیسزمیں اپنا وکالت نامہ جمع کرا دیا ہے۔