اسلام آباد (مانیٹرنگ ڈیسک)پاکستانی الیکشن میں بطور مبصر فرائض سر انجام دینے والے سابق بھارتی چیف الیکشن کمشنر شہاب الدین یعقوب قریشی نے پاکستان میں منعقدہ عام انتخابات 2018کو فری اینڈ فیئر اور شفاف ترین قرار دیدیا۔ تفصیلات کے مطابق پاکستانی الیکشن میں بطور مبصر فرائض سر انجام دینے والے سابق بھارتی چیف الیکشن کمشنر شہاب الدین یعقوب قریشی نے

پاکستان میں منعقدہ عام انتخابات 2018کو فری اینڈ فیئر اور شفاف ترین قراردیتے ہوئے کہا کہ پولنگ کے دوران کوئی گڑ بڑ نہیں ہوئی جبکہ ووٹوں کی گنتی کے دوران کوتاہیاں سامنے آئیں جس کی وجہ پولنگ عملے کی ٹریننگ نہ ہونا تھا۔ یہ بات انہوں نے ایک بھارتی چینل کو دئیے گئے اپنے انٹرویو میں کہی۔ شہاب الدین کا کہنا تھا کہ ہم نے 200 پولنگ ایجنٹس کے انٹرویوز کیے تو انہوں نے تمام تر انتظامات پر اعتماد کا اظہار کیا۔ تمام اقدامات کا جائزہ لینے کے بعد ہم کہہ سکتے ہیں کہ پاکستان میں اب کی بار شفاف ترین الیکشن ہوئے ۔ پاک فوج کے جوانوں کی تعیناتی کے حوالے سے ایک سوال کا جواب دیتے ہوئے ان کا کہنا تھا کہ پاک فوج نے الیکشن کے عمل میںکوئی مداخلت نہیں کی۔ الیکشن کمیشن کی جانب سے پولنگ سے پہلے غیر ملکی مبصرین کو بریفنگ دی گئی جس کے دوران ہم نے چیف الیکشن کمشنر سے سوال پوچھا کہ فوج کا الیکشن میں کیا کردار ہے تو انہوں نے ہمیں بتایا کہ 2013 میں بھی پاک فوج تعینات تھی لیکن جوانوں نے پولنگ اسٹیشنز کے باہر ڈیوٹی دی جس کی وجہ سے بڑے پیمانے پر گڑ بڑ ہوئی اس لیے 2018 میں جوانوں کو پولنگ اسٹیشنز کے اندر تعینات کیا گیا تاکہ بے ضابطگیاں نہ ہوسکیں۔شہاب الدین کا ہنا تھا کہ پاک فوج کے جوان پریزائیڈنگ افسران کے ماتحت رہ کر کام کرتے رہے اور انہوں نے ووٹنگ عمل میں کسی قسم کی کوئی مداخلت نہیں کی۔