اسلام آباد(مانیٹرنگ ڈیسک)الیکشن 2018میں کامیابی کے بعد چیئرمین پاکستان تحریک انصاف نے اب سے کچھ دیر پہلے بنی گالہ میں عوام سے خطاب کیا ۔عمران خان جیسے ہی تقریر کرنے کیلئے کیمرے کے سامنے آئے تو اس موقع پر واضح طور پر دیکھا جا سکتا تھا کہ تحریک انصاف کے نااہل رہنما جہانگیر ترین بھی سامنے آگئے اور موقع پر موجود لوگوں کو ہدایات دینے لگے ۔ اس موقع پر عمران خان انہیں دیکھتے رہے ۔

اس صورتحال پر نجی ٹی وی پروگرام میں گفتگو کرتے ہوئے سینئر صحافی حامد میر نے کہا کہ جہانگیر ترین کی جانب سے جو کچھ کیا گیا وہ غلط تھا۔ نااہل نوازشریف اور نااہل جہانگیر ترین کے درمیان کوئی فرق نہیں ۔یقیناً جہانگیر ترین کو میری یہ بات بری لگے گی۔لیکن عمران خان کو چاہئے کہ جہانگیر ترین کو اپنے سے دور ہی رکھیں۔جب آپ کہہ رہے ہیں کہ سب کا احتساب کریں گے ،کرپشن ختم کرینگے ،سب کیساتھ ایک جیساسلوک ہوگاتو اس وقت جہانگیر ترین کا اس کمرے میں موجود ہونا حیران کن ہے ۔