لاہور( این این آئی) تحریک انصاف کی حلقہ این اے 125 او رحلقہ این اے 129میں ممکنہ کامیابی کی خوشی چند گھنٹوں بعد ہی غمی میں بدل گئی ،پی ٹی آئی کے حامیوں نے رات گئے تک بھرپور جشن منایا تاہم صبح کے وقت بازی ہی پلٹ گئی ۔ تفصیلات کے مطابق پی ٹی آئی کی امیدوار ڈاکٹر یاسمین راشد اور مسلم لیگ (ن) کے وحید عالم کے درمیان کانٹے کا مقابلہ ہوا اور رات گئے تک نتائج حق میں ہونے پر بھرپور جشن منایا گیا ۔
تاہم صبح کے وقت غیر حتمی اور غیر سرکاری نتائج کے مطابق (ن) لیگ کے وحید عالم نے کامیابی حاصل کر لی جس پر پی ٹی آئی کے کارکنوں میں مایوسی پھیل گئی ۔دوسری جانب حلقہ این اے 129میں بھی رات گئے تک بازی عبد العلیم خان کے حق میں تھی تاہم جمعرات کی صبح ریٹرننگ آفیسر کی جانب سے غیر حتمی اور غیر سرکاری نتائج سامنے آنے پر پی ٹی آئی شکست کھا گئی اور (ن) لیگ کے ایاز صادق کامیاب ہو گئے ۔عبد العلیم خان کے حامیوں کی جانب سے بھی رات گئے مٹھائیاں تقسیم ،پیشگی مبارکبادیں بھی دیدی گئی تھیں۔
