اسلام آباد (آئی این پی)پاکستان میں چین کے سفارتخانے نے امریکی جریدے ’’وال اسٹریٹ جنرل‘‘ کی جانب سے چین پاکستان اقتصادی راہداری (سی پیک)کے باعث پاکستان کو درپیش قرضوں کے بحران کے حوالے سے رپورٹ کو مسترد کر دیا، چینی سفارتخانے کی جانب سے منگل کو اپنی ویب سائٹ پر جاری کردہ ایک بیان میں کہا گیا ہے کہ مذکورہ رپورٹ غیر ذمہ دارانہ ہے جس کا حقیقت سے کوئی تعلق نہیں،

ہم امید کرتے ہیں کہ میڈیا رپورٹس کو تعصب کی عینک پہنے بغیر سچ کے ساتھ بیان کرنا چاہیے جس میں تمام اطراف کا موقف اور درست حقائق شامل ہوں، امریکی جریدے کی رپورٹس میں حقائق کو گمراہ کن طور پر پیش کیا گیا ہے، سی پیک میں بیلٹ اینڈ روڈ کے تحت گزشتہ پانچ سالوں میں شاندار کامیابیاں حاصل ہوئیں،سی پیک پاکستان میں توانائی کے بحران کو ختم کرنے میں معاون ثابت ہوا جبکہ انفراسٹرکچر کو بہتر بنانے میں مدد ملی، منصوبے کے تحت پاکستان کی معیشت کو فروغ ملا، سی پیک کے ابتدائی منصوبوں میں لاہور اورنج لائن ٹرین کے منصوبے نے پاکستان میں پزیرائی حاصل کی ، جس کے باعث بڑی تعداد میں روزگار کے مواقعے پیدا ہوئے، اورنج لائن منصوبہ کے باعث ٹریفک کے مسائل کو حل کرنے میں مدد ملی جبکہ مسافروں کو آرام دہ سفر کی سہولیات میسر آئیں، پاکستانی حکومت کی جانب سے جاری کردہ اعداد و شمار کے مطابق ،42فیصد غیر ملکی قرضے کثیر الجہتی مالی اداروں کی جانب سے دیئے گئے، جن میں سے 18فیصد قرضے پیرس کلب سے حاصل کئے گئے، چین کی جانب سے حاصل کئے جانے والے قرضے صرف 10فیصد کے قریب ہیں جو کہ کمرشل بینک کے قرضوں کی نسبت انتہائی کم ریٹ پر مہیا کئے گئے ہیں،اگر اس تمام صورتحال کے باوجود بھی پاکستان کو قرضوں کے بحران کا سامنا ہے تو اس کا ذمہ دار چین نہیں ہے،سی پیک کے تحت دونوں ممالک کے مابین باہمی تعاون، مشترکہ مفادات اور برابری کی بنیاد پر طے پایا ہے، جس کے تحت تمام منصوبوں کیلئے جامع مشاورت کی گئی ہے۔