اسلام آباد (این این آئی) پاکستان تحریک انصاف کے چیئرمین عمران خان نے کہا ہے کہ سی پیک کی وجہ سے چین بھی انتخابات پر گہری نظر رکھے ہوئے ہے ٗ ہم منصوبے کی بھرپور حمایت جاری رکھیں گے۔ چینی میڈیا کو دیئے انٹرویو دیتے ہوئے عمران خان نے کہا کہ (آج) بدھ کو ملک بھر میں عام انتخابات ہو رہے ہیں اور سی پیک جیسے بڑے منصوبے کا روحِ رواں ہونے کی وجہ سے چین بھی انتخابات پر گہری نظر رکھے ہوئے ہے۔

عمران خان نے سی پیک کے متعلق انتہائی اہم اعلان کر تے ہوئے کہا کہ ہم سی پیک کی بھرپور حمایت جاری رکھیں گے۔چین اور پاکستان کے عوام کی مشترکہ کاوشوں سے یہ منصوبہ پایہ تکمیل کو پہنچ رہا ہے اور اس سے گزشتہ چند سالوں میں پاکستان کے کئی حصوں میں بہت تعمیر و ترقی ہوئی ہے۔ پاکستانی معاشرے کے تمام طبقات نے سی پیک کی بھرپور حمایت کی ہے اور مستقبل میں بھی کرتے رہیں گے۔عمران خان نے کہا کہ پاک اقتصادی راہداری منصوبے سے پاکستان میں تعمیر و ترقی کے علاوہ نوکریوں کے وسیع مواقع بھی میسر آ رہے ہیں۔ لوگوں کی بڑی تعداد سی پیک کے تحت کئی منصوبوں کی تعمیر اور ان کے آپریشن میں براہ راست حصہ لے رہی ہے اور روزگار حاصل کر رہی ہے۔مجھے یقین ہے کہ اس منصوبے کی اوسط اور طویل مدتی تعمیر کی سختی سے ضمانت دی جائے گی اور اس کی تکمیل کو یقینی بنایا جائے گا۔ واضح رہے کہ پلاننگ کمیشن کے اعدادوشمار کے مطابق سی پیک کے تحت تعمیر ہونے والے ابتدائی منصوبوں میں 38ہزار لوگوں کو نوکریاں ملی ہیں جن میں سے 75فیصد پاکستانی ہیں۔ توقع کی جا رہی ہے کہ آئندہ پانچ برس میں اس منصوبے میں 5لاکھ پاکستانیوں کو نوکریاں ملیں گی۔