اسلام آباد (این این آئی)پاکستان مسلم لیگ (ن) کی ترجمان اور سابق وفاقی وزیر مریم اورنگزیب نے کہا ہے کہ قائد مسلم لیگ (ن)محمد نواز شریف کیخلاف میڈیا کا ایک مخصوص حصہ جھوٹی اور من گھڑت خبریں چلا کر انتخابی نتائج پر اثر انداز ہونے کی کوشش کررہا ہے،جس نے بیماری کی حالت میں ہسپتال جانے سے انکار کیا ، اس پر ڈیل کا الزام لگانا شرمناک ہے۔منگل کو جاری بیان میں ترجمان مسلم لیگ (ن)مریم اورنگزیب نے کہا کہ قائد مسلم لیگ (ن) نواز شریف کے خلاف منفی پروپیگنڈا افسوسناک ہے۔انہوں نے کہا کہ الیکشن کمیشن آف پاکستان
کو انتخابی مہم کا وقت ختم ہونے کے بعد کسی جماعت کے پارٹی قائد کیخلاف منفی مہم کا نوٹس لینا چاہئے۔ انہوں نے کہا کہ ڈیل سمیت تمام منفی خبروں کو مسترد کرتے ہیں۔ انہوں نے کہا کہ محمد نواز شریف کی ڈیل کی جھوٹی خبریں پھیلانے کا مقصد مسلم لیگ کے ووٹرز کو پریشان کرنا ہے۔ انہوں نے کہا کہ محمد نواز شریف عوام کے ووٹ کی عزت کی خاطر ایک متنازعہ فیصلے کے باوجود اڈیالہ جیل میں ہیں۔ انہوں نے کہا کہ (آج) پچیس جولائی کو تمام منفی پروپیگنڈے دم توڑ جائیں گے اور ووٹ کو عزت دو کا تاریخی فیصلہ آئے گا۔
