اسلام آباد(مانیٹرنگ ڈیسک) لاہور کے حلقہ این اے 125 کے علاقے شفیق آباد میں نالے سے سینکڑوں شناختی کارڈ برآمد۔نجی ٹی وی کے مطابق لاہور کے حلقہ این اے 125 کے علاقے شفیق آباد کی یونین کونسل 50 میں گندے نالے سے سینکڑوں قومی شناختی کارڈ برآمد کیے گئے ہیں جو تین تھیلوں میں بند کرکے نالے میں ڈالے گئے تھے۔
پولیس کاکہنا ہےکہ شناختی کارڈ بند روڈ نالے سے برآمد ہوئے ہیں جنہیں تحویل میں لے لیا گیا ہے اور اس حوالے سے تحقیقات بھی شروع کردی گئی ہیں۔دوسری جانب این اے 125 سے تحریک انصاف کی امیدوار یاسمین راشد نے واقعے پر شدید تشویش کا اظہار کیا ہے۔انہوں نے کہاکہ دیکھنا ہوگا کہ کیا شناختی کارڈ متعلقہ علاقے کے رہائشیوں کے ہیں اور اس میں دھاندلی کی کوشش تو نہیں کی گئی۔ادھرسندھ کے علاقیعمر کوٹ میں کل 25 جولائی کو ہونے والے انتخابات کے سلسلے میں ایک جیپ میں چھپائے گئے جعلی بیلٹ پیپرز برآمد ہوئے ہیں، جبکہ پولیس نے 5 ملزمان کو بھی گرفتار کیا ہے۔پولیس کے مطابق بیلٹ پیپرز حلقہ پی ایس 52 کے گاوں بوڑھہ باھ لے جانیکی کوشش کی جارہی تھی۔عمر کوٹ کے علاقے پاکستان چوک کے قریب جیپ کو روک کر اس کی تلاشی لی گئی تو اس میں سے جعلی بیلٹ پیپرز برآمد ہوئے۔پولیس نے جعلی بیلٹ پیپر لے جانے والے 5ملزمان کو گرفتار کرلیا جن کا تعلق گاوں بوڑھہ باھ سے ہے۔پولیس نے یہ بھی بتایا ہے کہ گرفتار پانچوں ملزمان میں انور سومرو، حاکم، اقبال، کھنگھار اور نواب شامل ہیں جن سے تفتیش کی جا رہی ہے۔یاد رہے کہ الیکشن کیلئے تمام انتظامات مکمل کر لئے گئے ہیں ،پاکستانی عوام کل اپنے نمائندوں کا چنائو کریں گے۔
