لاہور (نیوز ڈیسک) سابق صوبائی وزیر قانون رانا ثناء اللہ کے احکامات پر عملدرآمد کرنے والے پولیس آفیسر رانا فرخ وحید کا ایک وڈیو بیان سامنے آیا ہے، جس میں انہوں نے رانا ثناء اللہ پر سنگین الزامات لگاتے ہوئے چونکا دینے والے انکشافات کیے ہیں۔ رانا فرخ وحید نے اپنے وڈیو بیان میں کہا کہ رانا ثناء اللہ سیاسی مقاصد کے لیے قتل کروایا کرتے تھے، انہوں نے مجھ سے غیر قانونی کام کروائے،
رانا فرخ وحید نے اپنے بیان میں کہا کہ رانا ثناء اللہ قاتل اور انتہائی سفاک ہے، فرخ وحید نے کہا کہ مجھے نوید کمانڈو کے ذریعے قتل کروانا چاہتے تھے اس کے علاوہ رانا فرخ نے انکشاف کرتے ہوئے کہا کہ رانا ثناء اللہ نے اپنے ہی دیرینہ ساتھی بھولا گجر کو قتل کروا دیا۔ رانا فرخ وحید نے کہا کہ میں رانا ثناء اللہ کے ڈر سے 2015ء میں ملک سے باہر چلا گیا تھا۔ رانا فخر وحید نے کہا کہ رانا ثناء اللہ کے جرائم کے شواہد موجود ہیں۔ واضح رہے کہ رانا فرخ وحید فیصل آباد شہر میں جعلی پولیس مقابلوں کے لیے مشہور تھے۔ میڈیا ذرائع کے مطابق رانا فرخ وحید کے خلاف گھیرا تنگ کیا جا رہا ہے اور اس کی گرفتاری کے لیے تمام قانونی تقاضے پورے کر لیے گئے ہیں۔ میڈیا ذرائع کے مطابق رانا ثناء اللہ کے کہنے پر رانا فرخ وحید کی مختلف تھانوں میں تعیناتی ہوتی رہے ہیں جہاں پر وہ ان کے لیے کام کرتے تھے۔ واضح رہے کہ رانا فرخ وحید پر فیصل آباد میں 2 بھائیوں سمیت 22 افراد کو جعلی پولیس مقابلوں میں قتل کرنے کا الزام بھی ہے۔ ذرائع کے مطابق پچھلے دو سال میں سب انسپکٹر رانا فرخ وحید نے 26 کے قریب لوگوں کو جعلی پولیس مقابلوں میں قتل کیا اور ان قتل ہونے والی شخصیات کی کسی نہ کسی حوالے سے رانا ثناء اللہ سے دشمنی تھی۔ یہ الزامات مسلم لیگ (ن) کے چوہدری شیر علی کی طرف سے رانا ثناء اللہ پرلگائے گئے تھے، جس میں چوہدری شیر علی نے کہا کہ رانا فرخ وحید کے ذریعے رانا ثناء اللہ نے اپنے مخالفین کو قتل کروایا۔ واضح رہے کہ رانا فرخ وحید آج کل انگلینڈ میں ہیں اور انہیں پاکستان لانے کے لیے تمام قانونی تقاضے مکمل کر لیے گئے ہیں۔
