اسلام آباد(مانیٹرنگ ڈیسک)ملتان کے حلقے این اے 157کے رہائشیوں نے گیلانی اور قریشی خاندان کے الیکشن لڑنے والے بچوں کے حوالے سے بینرز لگا دئیے، ایسا مطالبہ کر دیا کہ کسی کا پورا کرنا مشکل ہی نہیں اس وقت ناممکن بھی ہے۔ تفصیلات کے مطابق ملتان کے حلقے 157میں اس وقت دلچسپ صورتحال دیکھنے میں آئی ہے جب وہاں کے رہائشیوں نے گیلانی اور قریشی خاندان کے الیکشن میں مدمقابل صاحبزادوں علی موسیٰ گیلانی اور زین قریشی اور ن لیگ کے امیدوار عبدالغفار ڈوگر سے ووٹ

حاصل کرنے کیلئے ایسا مطالبہ وہ بھی بذریعہ بینرز کردیا ہے کہ تینوں امیدوار مشکل میں پھنس گئے ہیں۔ ملتان کے حلقہ این اے 157میں بینرز پر علاقہ مکینوں کی جانب سے تحریرکیا گیا ہے کہ ’’سیوریج اورگیس پائپ لائن دیں،ووٹ لیں،ورنہ حلقے میں نہ آئیںاورووٹ لیناہے توالیکشن سے قبل سیوریج اور گیس پائپ لائن بچھائیں۔واضح رہے کہ علی موسیٰ گیلانی پیپلزپارٹی، زین قریشی تحریک انصاف اور عبدالغفار ڈوگر جو کہ سابق رکن قومی اسمبلی ہیں حلقے سے انتخابی امیدوار ہیں۔