اسلام آباد (مانیٹرنگ ڈیسک) دو سال بعد اسمبلی جانے والے پی ٹی آئی چیئرمین عمران خان نے تنخواہ اور الائونسز کا مطالبہ کر دیا، نجی ٹی وی پروگرام میں معروف صحافی رئوف کلاسرا نے کپتان کی کلاس لے ڈالی۔ تفصیلات کے مطابق نجی ٹی وی پروگرام میں گفتگو کرتے ہوئے معروف صحافی رئوف کلاسرا کا کہنا تھا کہ عمران خان نے قومی اسمبلی سے تنخواہ اور الائونسز کی ادائیگی کا مطالبہ کیا ہے ۔

ان کا کہنا تھا کہ کوئی جا کر خان صاحب پوچھے کہ انہوں نے مورل گرائونڈ اور اخلاقی جرأت کے تحت اپنی تنخواہ اور الائونسز کا مطالبہ کیا ہے۔ رئوف کلاسرا کا کہنا تھا کہ عمران خان نے اگر سیشن الائونسز ، تنخواہ ، مراعات لیں تو کہ وہ معاشرے میں غلط مثالیں قائم کر رہے ہیںاگر آپ کے گھر میں آپ کا ملازم ، مالی یا باورچی دو سال کے لیے نہ آئے تو کیا آپ ان کو تنخواہ دیں گے؟ آپ میں سے کتنے لوگ ہیں جو دو سال غیر حاضر رہنے کے باوجود بھی اپنے ملازمین کو تنخواہ دیں گے؟ جو چیزیں آپ اپنے گھر کے لیے نہیں پسند کرتے وہ آپ ملک کے لیے کیسے پسند کر سکتے ہیں؟قومی اسمبلی میں جعلی حاضریاں لگائی گئیں مگر کسی نے سوائے یوسف تالپورکے اس چیز کا نوٹس نہیں لیا۔ انہوں نے اس کی تحقیقات کا مطالبہ کیا ہونا تو یہ چاہئے تھا کہ اپوزیشن سیٹوں پر بیٹھی پی ٹی آئی اس کا مطالبہ کرتی اور سوال کرتی کہ ہمیں بتایا جائے کہ کن لوگوں نے جعلی حاضریاں لگا کر مراعات یا الاؤنسز لیے ہیں مگر اب یہ لوگ ایک دوسرے کو طعنے دینے کے بھی قابل نہیںرہے۔واضح رہے کہ اس سے قبل رئوف کلاسرا نے قومی اسمبلی میں اراکین اسمبلی کی جانب سے جعلی حاضریاں لگائے جانے کا انکشاف کرتے ہوئے بتایا تھا کہ اراکین اسمبلی ایک دوسرے کی جعلی حاضریاں لگاتے ہیں اور اس کی وجہ یہ ہے کہ ان کو حاضری لگانے کا 5ہزار روپے ملتے ہیں اراکین اسمبلی اپنے ساتھی اراکین اسمبلی کو 5ہزار روپے کی خاطر جعلی حاضری لگانے کا کہتے ہیں اور خود اسمبلی کے سیشن میں نہیں آتے۔