اسلام آباد (این این آئی)عام انتخابات کیلئے نامزدگی فارمز کی چھپائی مکمل کر کے چاروں صوبائی الیکشن کمیشن کے دفاتر میں پہنچا دیئے گئے، پہلی بار نامزدگی فارم الیکشن کمیشن کے بجائے ارکان پارلیمنٹ نے تیار کرایا۔نجی ٹی وی کے مطابق عام انتخابات کیلئے نامزدگی فارم سے قرضوں، مقدمات، دہری شہریت، 3 سالہ ٹیکس کی معلومات، تعلیم، پیشہ اور ڈیفالٹر کے کالم غائب کر دیئے گئے ۔

نامزدگی فارم میں امیدوار صرف آرٹیکل 62، 63 پر پورا اترنے کا ڈیکلریشن دے گا ٗامیدوار ختم نبوت پر ایمان رکھنے کا حلف نامہ نامزدگی فارم میں دے گا۔آئندہ الیکشن کے نامزدگی فارم سے امیدوار کے بیرون ملک دوروں کی تفصیلات بھی غائب کر دی گئیں، غیرملکی دوروں کی تفصیلات غائب ہونے سے امیدوار اقامہ ظاہر نہیں کریں گے۔دریں اثناء الیکشن کمیشن نے عام انتخابات کیلئے پولنگ اسکیم کا ڈرافٹ تیار کر لیا ٗ حتمی پولنگ اسکیم 22 جون تک جاری کی جائے گی۔میڈیا رپورٹ کے مطابق الیکشن کمیشن نے پولنگ اسکیم کا ڈرافٹ ویب سائٹ پر جاری کر دیا، ڈرافٹ میں پولنگ اسٹیشنز، ووٹرز کی تعداد اور دیگر معلومات شامل ہیں، پولنگ اسکیم قومی و صوبائی اسمبلیوں کے 849 حلقوں کی جاری کی گئی۔الیکشن کمیشن کے مطابق، مجوزہ پولنگ اسکیم میں پولنگ اسٹیشنز، ووٹرز کی تفصیلات ہیں ٗپولنگ اسکیم میں پولنگ بوتھ، مرد خواتین ووٹرز کی تفصیل موجود ہے، مجوزہ پولنگ اسکیم پنجاب، سندھ، کے پی، بلوچستان، فاٹا، اسلام آباد کے حلقوں کی جاری کی گئی۔ذرائع کے مطابق، ضلعی الیکشن کمشنرز کی تیار کردہ پولنگ اسکیم ریٹرننگ افسران کو دے دی گئی، ریٹرننگ افسران 22 جون تک حتمی پولنگ اسکیم بنائیں گے۔