اسلام آباد(مانیٹرنگ ڈیسک) کراچی میں گرمی کی لہر اور ہیٹ اسٹروک عروج پر ، گرمی کی شدت سے اب تک100سے زائد شہری جان سے ہاتھ دھو بیٹھے ، گزشتہ چار روز کے دوران ہیٹ اسٹروک کے باعث ہلاک ہونے والے 180 افراد کی لاشیں ایدھی سرد خانوں میں لائی گئیں، فیصل ایدھی ۔ تفصیلات کے مطابق شہر قائد کراچی میں گرمی کی لہر اور ہیٹ سٹروک عروج پر ہے اور

کراچی سمیت سندھ بھر میں آج بھی شدید گرمی کی لہر برقرار رہے گی اور شہرِ قائد میں درجہ حرارت 41 ڈگری سینٹی گریڈ تک پہنچ گیاہے۔محکمہ موسمیات کے مطابق شہر میں جاری ہیٹ ویو کی لہر جمعرات تک برقرار رہ سکتی ہے اور جمعہ (25 مئی) سے درجہ حرارت میں کمی متوقع ہے۔دوسری جانب شدید گرمی اور ہیٹ ویو کے باعث 150سے زائد افراد کی ہلاکت کی اطلاعات موصول ہوئی ہیں۔ ایدھی فائونڈیشن کے سربراہ فیصل ایدھی کا کہنا ہے کہ گزشتہ چار روزکے دوران 180 لاشیں ہمارے پاس لائی گئی ہیں۔ترجمان ایدھی فاؤنڈیشن کے مطابق گزشتہ 3 دن میں مرنے والے افراد کی تعداد عام دنوں کے مقابلے میں بہت زیاد ہے، 3 دن میں 64 لاشیں ایدھی کے سرد خانوں میں رکھوائی گئیں۔ایدھی ترجمان کا دعویٰ ہے کہ مرنے والے افراد کے لواحقین کی اکثریت نے موت کی وجہ شدید گرمی اور ہیٹ اسٹروک بتایا ہے۔ترجمان کے مطابق مرنے والوں کی عمریں 10 سال سے 80 سال کے درمیان ہیں اور ان کا تعلق لانڈھی، کورنگی، نیو کراچی اورلیاری سمیت شہر کے دیگر علاقوں سے ہے۔ کراچی میں گرمی کی شدت کی وجہ سے محکمہ صحت نے اسپتالوں میں ایمرجنسی بھی نافذ کر رکھی ہے اور شہریوں کو احتیاطی تدابیر بھی دی گئی ہیں کہ وہ بلا ضرورت گھروں سے باہر نکلنے سے گریز کریں۔بصورت دیگر اپنے سر پر گیلا کپڑا رکھ کر گھر سے باہر نکلیں تاکہ ہیٹ اسٹروک سے بچا جا سکے۔

موضوعات:ایدھی سینٹر فیصل ایدھی کراچی ہیٹ ویو